Bozataw rayonında «Jergilikli Keńeslerdiń jumısın úlgili shólkemlestiriw» atamasında respublikalıq kórgizbeli seminar shólkemlestirildi.

Seminarǵa xalıq deputatları Bozataw rayonlıq Keńesi deputatları, siyasiy partiyalardıń basshıları, Xalıq deputatları qalalıq hám rayonlıq Keńesleri sekretariatlarınıń baslıqları, qánigeler hám ǵalaba xabar quralları wákilleri qatnastı.
Seminar dawamında qatnasıwshılardıń «Xalıq deputatları jergilikli Keńesiniń turaqlı komissiyalarınıń jumısın nátiyjeli shólkemlestiriw» temasında bayanatları tıńlandı.
Sońınan ilaj sheńberinde qatnasıwshılar jergilikli Keńestiń jumısı, deputatlardıń xalıq penen óz-ara birge islesiw mexanizmleri menen jaqınnan tanısıp, tájiriybe almastı.
Bunnan soń, seminar qatnasıwshıları rayonlıq Keńes sekretariatında bolıp, bul jerde hújjetlerdi júrgiziw, qadaǵalaw processleri hám jumıs islew tártibi boyınsha tájiriybe almastı.
Sonday-aq, turaqlı komissiya baslıqları tárepinen ámelge asırılıp atırǵan jumıslardıń nátiyjeliligi, áhmiyeti hám tájiriybeleri boyınsha sáwbetlesti.
Ilaj dawamında miymanlar Erkindárya awıl puqaralar jıyınına qaraslı «Aqeden» elatında húrmetli Prezidentimizdiń baslaması menen jańadan boy tiklegen Bozataw sanatoriyasınıń turmısı menen jaqınnan tanıstı.
Ilaj qatnasıwshıları bul jerde xalıqqa medicinalıq xızmet kórsetiwdiń túrleri hám sapası, jańa jumıs orınları shólkemlestirilgeni hám keleshektegi is-rejeleri tuwralı maǵlıwmatlarǵa iye boldı.

Adilbay Orazov,
Qaraqalpaqstan xabar agentligi sholıwshı