Ózbekstan hám Evropa Awqamı arasındaǵı birge islesiw keyingi jıllarda keńeyip, strategiyalıq hám ekonomikalıq áhmiyetke iye bolmaqta. Bul qatnasıqlar tek ǵana sawda-ekonomikalıq baylanıslardı rawajlandırıw emes, al siyasiy, ekologiyalıq hám sociallıq tarawlarda da óz tásirin kórsetpekte. Hár eki tárep ushın da nátiyjeli hám turaqlı birge islesiwdi bekkemlew áhmiyetli wazıypa sıpatında qaraladı.

Evropa Awqamınıń Ózbekstandaǵı elshisi Toyvo Klaar “Evropa Awqamı – Oraylıq Aziya” úshinshi ekonomikalıq forumınıń áhmiyeti haqqında ÓzA xabarshısına intervyu berdi:
– Búgin Ekonomikalıq forum, erteń Transkaspiy transport investiciya forumı hám juma kúni turizm konferenciyası ótkeriledi. Bul bolsa eki tárepleme qatnasıqlarımız qanshelli keńeygenin kórsetedi.
Evropa Awqamı hám Oraylıq Aziya ekonomikanıń barlıq tarawlarında jedel birge islesedi. Biz Tashkentte ózbek kásipleslerimiz benen birgelikte bul ilajdı shólkemlestirgenimizden oǵada quwanıshlımız.
Bul ilaj biziń birge islesiwimizge jáne bir kúshli túrtki beretuǵınına isenemen. Sonıń menen birge, forumda Ázerbayjan, Gruziya, Túrkiya sıyaqlı mámleketlerdiń wákilleri de qatnaspaqta. Biz áhmiyetli koridordaǵı barlıq tiykarǵı qatnasıwshılardı birlestirip atırmız.
Forum Ózbekstannıń Jáhán sawda shólkemine aǵza bolıwına da járdem bermekte. JSShǵa aǵza bolıw boyınsha sóylesiwler Evropa Awqamı tárepinen mámleketke turaqlı túrde járdem kórsetilgen baǵdarlardan biri bolıp esaplanadı. Biz ózbek sheriklerimizdi texnikalıq járdem menen qollap-quwatladıq. Sóylesiwler EA kózqarasınan derlik juwmaqlanǵan. Endi barlıq sherikler menen juwmaǵına jetiwin kútip qalamız. Bul Ózbekstanǵa tez waqıt ishinde JSShǵa aǵza bolıw imkaniyatın beredi.
“Jasıl” energetika hám klimattıń ózgeriwine qarsı gúresiw biziń birge islesiwimizde áhmiyetli baǵdar bolıp esaplanadı. Máselen, Qırǵızstandaǵı “Qambarata GES” boyınsha Oraylıq Aziyadaǵı sheriklerimiz benen birge islesip atırmız. Bul GES tek ǵana Qırǵızstandı emes, al qońsı mámleketlerdi de energiya menen támiyinlewge xızmet etedi.
Bunnan tısqarı, “jasıl” energiyanı rawajlandırıw hám onı Evropaǵa jetkeriw imkaniyatların birgelikte úyreniwge úlken qızıǵıwshılıq bar. Jáne de áhmiyetlisi, Oraylıq Aziyada biznes ortalıǵın rawajlandırıw maqsetimiz. Bul bolsa Evropa kompaniyalarınıń regionda belsene qatnasıwın támiyinleydi.
Evropa Awqamı hám Oraylıq Aziya birge islesiwindegi tiykarǵı tosqınlıqlar aralıq penen baylanıslı bolıp, olardı transport baylanısları arqalı jeńiw múmkin. Sonıń menen birge, region Evropa kompaniyaları ushın investiciya hám biznes júrgiziwde múnásip orınǵa aylanıwı kerek. Forum áne usı maqsetlerdiń orınlanıwına qaratılǵanı menen áhmiyetli.

ÓzA