Ózbekstannıń Bangladeshtegi elshisi Sardor Rustamboev usı mámleket Prezidenti Muhammad Shahobuddinǵa isenim jarlıqların tapsırdı. Bul haqqında “Dunyo” málimleme agentligi xabar berdi.

Málim etiliwinshe, saltanatlı máresimnen soń bolıp ótken sóylesiw waqtında Ózbekstan hám Bangladesh arasındaǵı siyasiy, sawda-ekonomikalıq, investiciyalıq, mádeniy-gumanitarlıq hám basqa da tarawlardaǵı qatnasıqlardıń búgingi jaǵdayı hám olardı rawajlandırıw perspektivaları dodalandı.
Sonday-aq, ushırasıwda Bangladesh húkimetiniń mámleketler arasındaǵı sawda-ekonomikalıq birge islesiwdi rawajlandırıwǵa ayrıqsha áhmiyet qaratıp atırǵanı bildirilgen.
Toqımashılıq, farmacevtika hám bılǵarı sanaatı sıyaqlı tarawlarda sheriklik ushın salmaqlı potencial bar ekenligi atap ótildi. Bangladesh tárepi bul baǵdarlarda tájiriybe almasıw hám jańa joybarlardı birgelikte ámelge asırıwǵa tayar ekenin málim etken.
Atap ótiliwinshe, sóylesiwde mádeniy-gumanitarlıq, atap aytqanda, turizm hám joqarı bilimlendiriw tarawlarındaǵı sheriklikti rawajlandırıwǵa da ayrıqsha itibar qaratılǵan.
Muhammad Shahobuddin Ózbekstandı Bangladeshtiń Oraylıq Aziyadaǵı tiykarǵı regionallıq sherigi hám isenimli dostı dep ataǵan. Ol sońǵı jılları Prezident Shavkat Mirziyoevtiń basshılıǵında turmıstıń barlıq tarawlarında ámelge asırılıp atırǵan jedel reformalar hám izbe-iz baslamalar sebepli mámleketimizdiń xalıqaralıq maydandaǵı abırayı hám imidji joqarılap atırǵanın ayrıqsha atap ótken.
Maǵlıwmat ushın, Ózbekstan hám Bangladesh arasında diplomatiyalıq qatnasıqlar 1992-jıl 15-oktyabrde ornatılǵan.

Qaraqalpaqstan xabar agentligi