Qońırat rayonında Prezidentimizdiń 2024-jıl 30-dekabrdegi «Awıl xojalıǵı maydanlarındaǵı qosımsha imkaniyatlardan paydalanǵan halda ónim jetistiriwdi kóbeytiwge baylanıslı ilajlar haqqında»ǵı qararında belgilengen áhmiyetli wazıypalardıń orınlanıwın támiyinlew maqsetinde kórgizbeli seminar ótkerildi.

Ilajda Qaraqalpaqstan Respublikası Ministrler Keńesi Baslıǵınıń orınbasarı, Awıl xojalıǵı ministri Sh.Teshaev, taraw juwapkerleri, Karantin agentligi wákilleri fermer xojalıqlarınıń basshıları hám tiyisli taraw juwapkerleri qatnastı.
Seminar dawamında qarar sheńberinde ámelge asırılıp atırǵan ilajlar, atap aytqanda, atız shetlerinen nátiyjeli paydalanıw, paydalanılmay atırǵan maydanlardı qayta paydalanıwǵa kirgiziw, biyday eginleri boyınsha agrotexnika talapları hám máwsimlik jumıslardı durıs shólkemlestiriw, biydaydı azıqlandırıw (suspenziya) texnologiyaların engiziw, ónimdarlıqtı arttırıwǵa qaratılǵan ámeliy usınıslar talqılandı.
Isbilermen hám fermerlerdiń tájiriybesin arttırıw, zamanagóy agrotexnologiyalardı keńnen engiziw, sonday-aq usı qarardıń orınlanıwın sistemalı shólkemlestiriw boyınsha anıq wazıypalar belgilep berildi.
Seminarda taraw qánigeleri tárepinen fermerlerge ámeliy kónlikpeler berildi hám máwsimlik agrotexnikalıq ilajlardı sapalı shólkemlestiriw boyınsha usınıslar bildirildi.
Kórgizbeli seminarlar basqa da rayonlarda dawam etpekte.

Qaraqalpaqstan xabar agentligi