Ekonomika hám qarjı ministrligi tárepinen járiyalanǵan 2026-2028-jıllarǵa mólsherlengen byudjet joybarında ayırım túrdegi, sonıń ishinde, alkogol, temeki hám neft ónimleri ushın akciz salıǵınıń ózgeretuǵının málim etti.

Atap ótiliwinshe, xalıq arasında salamat turmıs tárizin xoshametlew, sonday-aq, JDSShnıń jergilikli hám import etiletuǵın temeki hám alkogol ónimleri ushın akciz salıǵı stavkaların basqıshpa-basqısh birlestiriw talaplarınan kelip shıǵıp, ayırım túrdegi ónimler ushın akciz salıǵı muǵdarların ózgertiw usınıs etilmekte.
Atap aytqanda, PP-85-sanlı párman hám JSSh talaplarınan kelip shıǵıp, 2027-jıl 1-yanvarǵa shekem alkogol ónimleri ushın akciz salıǵı stavkaların birdey etiw maqsetinde araq, konyak hám basqa da alkogol ónimleri ushın akciz salıǵı stavkasın 2026-jıl 1-fevraldan jergilikli ónimlerge 1 litr ushın 48 mıń sum, import etiletuǵınǵa 1 litr ushın 60 mıń sum jáne 2026-jıl 1-iyulden stavkalardı teńlestirgen halda 1 litr ushın 48 mıń sum etip belgilew názerde tutılmaqta.
Sonday-aq, 2026-jıl 1-fevraldan jergilikli hám import etiletuǵın vino hám pivo boyınsha tómendegi salıq stavkaların belgilew usınıs etilmekte:
– tábiyǵıy vinonıń 1 litri ushın jergilikli islep shıǵarıwshılarǵa 7 mıń sum hám import etiletuǵın ónimlerge 12 mıń sum jáne basqa túrdegi vinolardıń 1 litri ushın jergilikli islep shıǵarıwshılarǵa 9 mıń sum hám import etiletuǵın ónimlerge 15 mıń sum;
– pivonıń 1 litri ushın jergilikli islep shıǵarıwshılarǵa 3 mıń sum hám import etiletuǵın ónimlerge 5 mıń sum. 2026-jıl 1-iyulden baslap akciz salıǵı stavkaların teńlestirgen halda tábiyǵıy vinonıń 1 litri ushın 10 mıń sum, basqa túrdegi vinonıń 1 litri ushın 12 mıń sum, sonday-aq, pivonıń 1 litri ushın 4 mıń sum muǵdarında belgilew usınıs etilmekte.
2026-jıl 1-yanvardan baslap 1 litr tutınıw hám texnikalıq etil spirti ushın 15 mıń sum akciz salıǵı stavkasın saqlap qalǵan halda, etil spirtiniń bas frakciyasına akciz salıǵın 1 litr ushın ámeldegi 15 mıń sumnan 5 mıń sumǵa shekem tómenletiw usınıs etilmekte.
Sonıń menen birge, 2026-jıl 1-fevraldan sigara, shılım ushın temeki, oramalı temeki, qızdırılatuǵın temeki tayaqshası hám veypler ushın, 2026-jıl 1-iyulden bolsa filtrli, filtrsiz sigaretalarǵa salıq stavkaların 7 procentke arttırıw usınıs etilmekte. Onda jergilikli islep shıǵarıwshılar hám import etiletuǵın ónimler ushın birdey stavka qollanǵan halda sigaretalardıń mıń danası ushın 365 mıń sum, sigaranıń bir danası ushın 21,5 mıń sum, shılım ushın temeki, shegiletuǵın oramalı temekiniń 1 kg ushın 642 mıń sum, qızdırılatuǵın temeki tayaqshasınıń 1 kg ushın 481,5 mıń sum, veyplerdiń 1 ml ushın 2,14 mıń sum etip belgilew usınıs etilmekte.
2026-jıl 1-aprelden baslap quramında qumsheker yamasa mazalı dám beriwshi zat bolǵan jáne energetikalıq hám tetiklewshi ishimlikler boyınsha quramındaǵı qumsheker elementiniń muǵdarına qarap progressiv tártipte salıqqa tartıw usınıs etilmekte.
Atap aytqanda, quramında qumsheker bolǵan 100 ml ishimliklerdegi qumsheker muǵdarı:
– 5 grammǵa shekem bolǵanda 1 litri ushın 500 sum (ámeldegi stavka);
– 5 grammnan 10 grammǵa shekem bolǵanda 1 litri ushın 515 sum;
– 10 grammnan joqarı bolǵanda 1 litri ushın 535 sum.
Sonday-aq, quramında qumshekerden basqa mazalı dám beriwshi elementler bolǵan ishimliklerge 1 litri ushın 500 sum hám energetikalıq hám tetiklewshi ishimlikler ushın akciz salıǵı stavkasın 1 litr ushın 2 150 sum etip belgilew usınıs etilmekte.
Onda, ulıwma awqatlanıw tarawındaǵı kárxanalar jáne jeke tártiptegi isbilermenler tárepinen tayarlanıp tutınıwshılarǵa realizaciyalanǵan ishimlikler akciz salıǵına tartılmawı boyınsha anıqlastırıwshı qaǵıydalar kirgizilmekte, sonday-aq, tovarlar quramındaǵı qant muǵdarı boyınsha maǵlıwmat tutınıw qadaǵında kórsetilmegen jaǵdayda eń joqarı salıq stavkasınıń qollanılıwı názerde tutılmaqta.
2026-jıl 1-aprelden neft ónimlerin islep shıǵarıw hám aqırǵı tutınıwshılarǵa satıwda belgilengen akciz salıǵınıń stavkasın 7 procentke arttırıw, polietilen granulaları (10 procent) hám tábiyǵıy gaz (12 procent) ushın bolsa ámeldegi salıq stavkasın saqlap qalıw usınıs etilmekte,- dep málimleme beredi xabar.uz saytı.

Qaraqalpaqstan xabar agentligi