Ózbekstan Respublikası Prezidentiniń 2025-jıl 19-marttaǵı tiyisli pármanı hám qararı menen sırt elde jasap atırǵan watanlaslar menen turaqlı qarım-qatnas ornatıw, olardıń elimizde ámelge asırılıp atırǵan reformalarda belsene qatnasıwın támiyinlew hám qollap-quwatlaw, sonday-aq, olardıń huqıqları menen nızamlı máplerin hár tárepleme qorǵaw máseleleri sapa jaǵınan jańa basqıshqa shıqtı.

Ózbekstan delegaciyasınıń Ullı Britaniyaǵa saparı dawamında Ózbekstannıń usı mámlekettegi elshixanasında watanlaslar menen ushırasıw ótkerildi.
Onda bul mámlekette waqtınsha bolıp turǵan 100 den aslam watanlaslarımız, London qalasındaǵı túrli tarawlarda miynet etip atırǵan, joqarı bilimlendiriw mákemelerinde oqıp atırǵan ózbek studentleri, “Uzbekistan Students Union” (UzSU) – Ullı Britaniyada oqıp atırǵan Ózbekstan studentlerin birlestiriw ushın shólkemlestirilgen jaslar shólkeminiń wákilleri qatnastı.
Ushırasıwda Ózbekstan Respublikası Milletleraralıq qatnasıqlar hám sırt eldegi watanlaslar máseleleri boyınsha komitetiniń baslıǵı Qahramon Sariev Ózbekstanda hár qıylı tarawlarda keń kólemli imkaniyatlar jaratılıp atırǵanı, sonıń ishinde, sırt eldegi watanlaslardı qorǵaw hám qollap-quwatlawda pútkilley jańasha qatnaslar tiykarında sistemalı jumıslar ámelge asırılıp atırǵanın atap ótti.
Usı kózqarastan, komitet baslıǵı Q.Sariev ushırasıw qatnasıwshılarına Ózbekstan Respublikası Prezidenti Shavkat Mirziyoevtiń baslaması menen sırt eldegi watanlaslar menen baylanıslardı rawajlandırıw, olardıń huqıqları menen erkinliklerin qorǵaw baǵdarındaǵı maqset hám wazıypalar haqqında málimleme berdi.
Sonday-aq, Prezidentimizdiń usı jıl 19-mart kúni qabıl etilgen Milletleraralıq qatnasıqlar hám sırt eldegi watanlaslar máseleleri boyınsha komitetin shólkemlestiriwge qaratılǵan pármanı hám qararında belgilengen wazıypalar sheńberinde sırt elde jasap atırǵan watanlaslar menen birge islesiw baylanısların jáne de bekkemlewge qaratılǵan “Uz Global Think”, “Who Is Who”, BMSh Rawajlanıw baǵdarlamasınıń “Sırt eldegi watanlaslar arqalı bilimlerdi transferlew” (TOKTEN) baǵdarlaması, sırt el oqıw orınların pitkerip, sol mámleket aymaǵında jasap, islep atırǵan watanlaslardı birlestiretuǵın, olardı qollap-quwatlaytuǵın “Ózbekstanlı pitkeriwshiler” sıyaqlı joybarlar haqqında maǵlıwmat berildi.
Ushırasıw dawamında Ullı Britaniya aymaǵında watanlaslarımızdıń jumısqa jaylasıwı menen baylanıslı qıyınshılıqlar dodalandı. Bul másele boyınsha tiyisli shólkemlerge Komitet tárepinen múrájat etiliwi hám mashqala tez pursatta saplastırılıwı haqqında maǵlıwmat berildi. Ushırasıw sońında watanlaslarǵa ózbek tilindegi bir qatar ádebiyatlar tarqatıldı.

N.Usmonova,
ÓzA