2025-jıl 12-noyabrde kúshke kirgen “Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam menen miynet migrantları ushın jańa imkaniyatlar jaratıldı. Bul qanday imkaniyatlar?

Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komitetiniń baslıǵı Alisher Azamxwjaev bul haqqında aytıp berdi:
– Aytıp ótiw kerek, miynet migrantlarınıń sanı 2,1 million adam bolıp, sonnan 70 procentin er adamlar, 30 procentin hayal-qızlar, qalǵanın jaslar quraydı.
Usı jıl dawamında sırt eldegi 90 mıńǵa shamalas watanlasımızǵa Agentlik wákilxanaları tárepinen málimleme-másláhát, huqıqıy, sociallıq hám materiallıq járdem xızmetleri kórsetilgen.
Ámelge asırılıp atırǵan jumıslardıń nátiyjeliligin arttırıw, tarawda ashıq-aydınlıq, esap beriw hám qadaǵalaw mexanizmlerin bekkemlew, jeke menshik sektordıń rolin kúsheytiw maqsetinde nızamshılıq jetilistirildi.
Usı jerde puqaralardı sırt elge jumısqa jaylastırıw jumısı menen shuǵıllanıwshı jeke menshik bántlik agentlikleriniń sanı 2 esege kóbeyip, 33 ke jetkenin atap ótiw kerek.
Jeke menshik bántlik agentlikleriniń sanınıń kóbeyiwi, óz gezeginde, puqaralardıń huqıqları menen máplerin isenimli qorǵaw, licenziya talapları menen shártlerine ámel etiliwin támiyinlewde qadaǵalawshı uyımnıń juwapkershiligin bunnan bılay da arttırıwdı talap etedi.
Sonlıqtan, jańa nızam menen Hákimshilik juwapkershilik haqqındaǵı kodeks jańa 255-1-statya menen tolıqtırıldı. Oǵan bola, Migraciya agentligi atınan hákimshilik huqıqbuzarlıqlar haqqındaǵı islerdi kórip shıǵıw hám járiyma salıw túrindegi hákimshilik jaza ilajların qollanıwǵa Agentlik direktorı hám onıń orınbasarları haqılı ekenligi belgilendi.
“Jeke menshik bántlik agentlikleri haqqında”ǵı nızamǵa kirgizilgen qosımshaǵa muwapıq, puqaralarǵa kórsetilip atırǵan xızmetler ushın tólemlerdi nızamlı tiykarda óndiriw belgilendi. Yaǵnıy, rezervke alınatuǵın qarjınıń eń az muǵdarı bazalıq esaplaw muǵdarınıń 8,5 mıńnan 4 mıń esege shekem tómenletildi.
Shártnamada táreplerdiń huqıqları, minnetlemeleri hám juwapkershiligi, sonıń ishinde, jeke menshik bántlik agentligi hám sırt elli jumıs beriwshilerdiń shártnama minnetlemelerin orınlamaǵanı yamasa zárúr dárejede orınlamaǵanı ushın jumıs izlep atırǵan shaxs aldında solidar juwapkershiligin belgilew, rezerv qarjıların kommerciyalıq banklerge jaylastırıwdan alınatuǵın procent dáramatların jeke menshik bántlik agentlikleri tárepinen erkin túrde basqarılıwına baylanıslı nızamlı tiykarlar belgilendi.
Jeke menshik bántlik agentligine xızmetler kórsetiw haqqındaǵı shártnamalardı Migraciya agentliginiń «Xorijda ish» miynet migraciyası elektron programmalıq kompleksinde real waqıt rejiminde dizimnen ótkeriw minnetlemesi júklendi.
Migraciya qorı qarjılarınan paydalanıwdıń tiykarǵı baǵdarları belgilendi. Qárejetlerdi qarjılandırıw mexanizmlerine anıqlıq kirgizildi.
Nızam menen sırt elde waqtınsha miynet etiwdi ámelge asırıw tileginde bolǵan puqaralardıń huqıqların qorǵaw kepilligi kúsheytildi. Migraciya xızmetlerin sanlastırıw arqalı tarawda salamat báseki ortalıǵı jaratıladı.

ÓzA