“Qaraqalpaqstan” temir jol shegara bajıxana postında “Beynew-Nókis” jónelisindegi jolawshı poezdınıń 11-sanlı vagonında jolawshı sıpatında kiyatırǵan puqaranıń qol júginiń ishinde bajıxana qadaǵalawına usınbaǵan 10 dana «BAOFENG» atlı radio baylanıs quralların hesh qanday hújjetlersiz Qazaqstan Respublikasınan alıp kiyatırǵanlıǵı anıqlandı.

Usı jerde bajıxana basqarması radiochastota spektrinen paydalanıw hám radioelektron qurallar hám joqarı chastotalı qurılmalardı tek ǵana “Elektromagnit sáykeslesiw orayı” mámleketlik unitar kárxanası tárepinen berilgen ruxsatnama tiykarında alıp kiriwge jol qoyılatuǵınlıǵın eskertedi.
Bunday qurılmalardı ruqsatnamasız alıp kiriw bajıxana nızamshılıǵına qayshı bolıp, olar bajıxana uyımları tárepinen toqtatılıp, radiochastota arqalı isleytuǵın qurılmalardı sırt elden Ózbekstanǵa alıp kiriwde álbette ruqsatnama talap etiledi.
Házirgi waqıtta anıqlanǵan jaǵday boyınsha sorastırıw jumısları alıp barılmaqta.

Á.Jiyemuratov,
Qaraqalpaqstan xabar agentligi