Microsoft kompaniyasınıń tiykarın salıwshısı Bill Geyts jaqın 10 jıl ishinde miynet bazarında keskin ózgerisler bolatuǵının ayttı. Onıń boljawı boyınsha, 2034-jılǵa barıp adamlar háptesine tek eki kún isleydi.

Geytstiń sózlerine bola, keleshekte jasalma intellekt hám neyron tarmaqlar kóplegen kásiplerdi basqaradı. Adamlardıń kúndelikli minnetlemeleri azayıp, kóp jaǵdaylarda tolıq jumıs háptesine zárúrlik qalmaydı. “JI processlerdi tezlestiredi, anıqlıqtı arttıradı hám kóp tarawlarda insan miynetin tolıqtıradı”, – deydi ol.
Bill Geyts jasalma intellekt járdeminde medicina tarawındaǵı mashqalalar, atap aytqanda, shıpaker hám psixologlardıń jetispewshiligi sheshiliwi múmkin ekenligin atap ótken. Sonday-aq, ol bul texnologiyalar insaniyatqa dóretiwshilik, bilimlendiriw hám jeke ómir ushın kóbirek waqıt ajıratıw imkaniyatın beretuǵının atap ótken.
“Texnologiyalıq rawajlanıw adamlardı jumıssız emes, al erkinrek etedi. Jumıs processleri avtomatlastırılǵan sayın, adamlar óz qızıǵıwshılıqları hám dóretiwshilik ideyaları menen shuǵıllanıw ushın kóbirek waqıt tabadı”, – degen Geyts.
Sonday-aq, ol keleshekte ofiske barıw zárúrligi azayatuǵının, aralıqtan turıp islew ádettegi jaǵdayǵa aylanatuǵının aytqan. Bul bolsa adamlardıń turmıs sapasın hám abadanlıǵın arttırıwǵa xızmet etedi.
Analitiklerdiń pikirinshe, Geytstiń bul pikirleri jasalma intellekttiń jedel rawajlanıp atırǵanın hám miynet qatnasıqların pútkilley ózgertiwi múmkin ekenligin jáne bir márte kórsetpekte.

Madinabonu NASRIEVA,
Anvarxwja AHMEDOV,
ÓzAnıń xabarshıları