Házirgi kúnlerde Ózbekstan Respublikası mektepke shekemgi hám mektep bilimlendiriwi ministri Ezoza Karimova basshılıǵındaǵı delegaciya Qatar mámleketi paytaxtı Doxa qalasında bolıp tur.

Sapar etiw sheńberinde delegaciya wákilleri “WISE 12 global” sammitinde qatnastı.
Bul abıraylı xalıqaralıq ilajda xalıqaralıq shólkemler hám húkimet wákilleri, bir qatar mámleketlerdiń bilimlendiriw ministrleri hám elshixanalarınıń basshıları qatnastı.
Sammit dawamında qatnasıwshılar tárepinen áhmiyetli máseleler dodalandı. Insan qádiriyatların ústin qoyǵan bilimlendiriw, jasalma intellekt hám texnologiyalar sharayatında insan bilimlendiriw modelleri, innovaciyalardı ámeliyatqa engiziw, inklyuzivlik, beyimlesiwsheńlik hám jaslarǵa imkaniyatlar jaratıw sıyaqlı temalar solardıń qatarına kiredi.
Sonday-aq, ilaj sheńberinde bilimlendiriw tarawı juwapkerleriniń qatnasıwında dógerek sáwbeti de bolıp ótti. Onda insan kapitalın rawajlandırıwda bilimlendiriw sistemasınıń roli, sanlı qatnaslar hám innovaciyalıq sheshimlerdiń áhmiyeti, xalıqaralıq birge islesiwdi kúsheytiw zárúr ekenligi atap ótildi.
Sapar etiw dawamında óz-ara paydalı ushırasıw hám sóylesiwler de bolıp ótti. Olarda bilimlendiriw tarawında birge islesiwdi keńeytiw, pedagoglardıń mamanlıǵın arttırıw, ekologiya hám klimat boyınsha bilimlendiriw baslamaları, xalıqaralıq almasıw baǵdarlamaların rawajlandırıw, oqıwshılardıń dúnyaǵa kózqarasın keńeytiw ushın olardıń almasıw baǵdarlamaların islep shıǵıw máseleleri dodalandı.

N.Usmonova, ÓzA