Mámleketimizdi sociallıq-ekonomikalıq jaqtan rawajlandırıw, sonıń ishinde, xalıqtıń turmıs abadanlıǵın arttırıw, bank, bilimlendiriw, densawlıqtı saqlaw, mádeniyat hám sporttı jáne basqa da tarawlardı rawajlandırıwǵa qaratılǵan keń kólemli jumıslar alıp barılmaqta.

Sonıń menen birge, finanslıq xızmetler qamtıp alıwın keńeytiw hám xalıqaralıq islam finansı standartlarına muwapıq jańa túrdegi bank xızmetlerin engiziw menen bir qatarda ámelge asırılıp atırǵan ilajlardıń óz waqtında qarjılandırılıwın támiyinlew hám qosımsha qárejetler dereklerin anıqlaw zárúrligi júzege kelgen.
Senattıń Byudjet hám ekonomikalıq máseleler komitetiniń májilisinde bul haqqında sóz boldı.
Májiliste kórip shıǵılǵan “Ózbekstan Respublikasınıń ayırım nızam hújjetlerine Ózbekstanda islam bank jumısın engiziwge qaratılǵan qosımshalar hám ózgerisler kirgiziw haqqında”ǵı nızam menen islam bank jumısın ámelge asırıw huqıqın beretuǵın licenziya arqalı bankler islam qarjılandırıwına baylanıslı xızmetler kórsetiwi múmkin ekenligi belgilenbekte.
Bunnan tısqarı, 2025-jıl ushın Ózbekstan Respublikasınıń Mámleketlik byudjeti haqqındaǵı nızamǵa bilimlendiriw, densawlıqtı saqlaw, mádeniyat hám sporttı rawajlandırıw, “Kámbaǵallıqtan abadanlıqqa qaray” baǵdarlaması sheńberindegi ilajlardı qarjılandırıw hám basqa da bir qatar ilajlar ushın qosımsha qarjılar ajıratılıwın názerde tutatuǵın ózgerisler kirgizilmekte.
Ministrler Kabinetiniń rezerv qorınıń kólemi, Mámleketlik byudjetten mámleketlik maqsetli qorlarǵa ajıratılatuǵın transfertlerdiń muǵdarları da ózgertilmekte.
Komitet aǵzaları nızamlardıń qabıl etiliwi mámleketimizde islam bank xızmetlerin basqıshpa-basqısh engiziw, jasırın ekonomika úlesin azaytıw jáne Ózbekstan Respublikası Mámleketlik byudjeti hám mámleketlik maqsetli qorları byudjetleri qarjılarınıń maqsetli jáne nátiyjeli jumsalıwın támiyinlewge xızmet etetuǵının ayrıqsha atap ótti.

ÓzA