Ózbekstanda hayal-qızlarǵa bolǵan kúsh kórsetiw hám zorlıqqa shek qoyıw, olardı qorǵaw hám sociallıq qollap-quwatlaw boyınsha ámelge asırılıp atırǵan jumıslar kúnnen-kúnge kúsheymekte.

Mámleket tárepinen sociallıq qorǵaw sistemasın jetilistiriw, turmıslıq zorlıqqa ushıraǵan hayal-qızlardı qollap-quwatlaw hám olardı reabilitaciyalawǵa qaratılǵan kompleksli ilajlar jolǵa qoyılǵan.
– Keyingi jıllarda kúsh kórsetiw hám zorlıqqa qarsı gúresiw tarawında bir qatar áhmiyetli nızamlar qabıl etildi, – deydi Ózbekstan Respublikası Prezidenti janındaǵı Sociallıq qorǵaw milliy agentliginiń bas qánigesi Zulfiya Abdurasulova. – Sonıń menen birge, sanlı xızmetler jolǵa qoyıldı hám “Insan” sociallıq xızmetler orayları jáne arnawlı reabilitaciya orayları sisteması qáliplestirildi. Bul oraylar arqalı hayal-qızlar qorǵaw orderlerin alıw hám qáwipsiz jerge ornalasıw imkaniyatına iye bolmaqta.
Kúsh kórsetiw hám zorlıqtan jábirlengen hayallar hám olardıń erjetpegen perzentleri qıstawlı qabıllaw bólimleri janındaǵı Birlemshi járdem xanalarına múrájat etiwi múmkin. Ol jerde olarǵa tez medicinalıq járdem kórsetiledi hám psixolog, huqıqtanıwshı hám sociallıq xızmetker tárepinen 3 kún dawamında tiyisli járdem beriledi. Zárúr bolsa, jábirleniwshiler Hayal-qızlardı reabilitaciyalaw hám beyimlestiriw orayına jiberiledi.
Kúsh kórsetiw yamasa zorlıq jaǵdayı haqqında “Insan” sociallıq xızmetler orayları yamasa máhálledegi sociallıq xızmetker, ishki isler uyımlarınıń 102 nomerine yamasa profilaktika inspektorları, “112” birden-bir dispetcherlik xızmeti, 1146 qısqa sanlı “isenim telefonı”na múrájat etiwi múmkin.
Múrájat etkennen soń bir sutka ishinde profilaktika inspektorı zorlıq islegen shaxs penen sáwbet ótkeredi. Sociallıq xızmetker jábirleniwshiniń jaǵdayın bahalaydı. Zárúr bolsa qorǵaw orderi rásmiylestiriledi hám jábirleniwshi qáwipsiz orınǵa jaylastırıladı.
“Insan” orayları hám Hayal-qızlardı reabilitaciyalaw hám beyimlestiriw respublikalıq orayı tárepinen hayal-qızlar hám olardıń balalarına sociallıq xızmetler kórsetiledi. Jańa elektron modul arqalı qorǵaw orderleri hám jábirleniwshi maǵlıwmatları real waqıtta oraylarǵa jetkeriledi. Bul járdemdi tez hám nátiyjeli shólkemlestiriw imkaniyatın beredi.
Bir sóz benen aytqanda, hayal-qızlardıń qáwipsizligi – jámiyettiń turaqlılıǵı hám keleshek áwlad ushın úlken áhmiyetke iye.

ÓzA