Respublikamızda gúzgi-qısqı máwsimde xalıqtıń járdemge mútáj qatlamın qollap-quwatlaw jumısları jedel ámelge asırılmaqta.

Mámleketimiz basshısınıń usı jıl 2-apreldegi “Janılǵı-energetika tarawında bazar mexanizmlerin engiziwde járdemge mútáj xalıqtı mámleket tárepinen qollap-quwatlawdıń qosımsha ilajları haqqında”ǵı qararına muwapıq, 2025-2026-jılǵı jılıtıw máwsiminde járdemge mútáj shańaraqlarǵa materiallıq járdem pulları tolıq jetkerip berildi.
Usı materiallıq járdemdi alıp, kirip kelgen gúzgi-qısqı máwsimniń qırawlı kúnlerinen kewli tınısh tawǵan hám minnetdar bolǵan mıńlaǵan xalıq arasında 6 perzenttiń anası Gúlmira Aymaǵanbetova da bar.
– Ótken jılı kommunallıq tólemlerdi tólewge qıynaldıq, – deydi Taqıyatas rayonındaǵı «Aydın jol» máhállesi turǵını G.Aymaǵanbetova. – Bıyıl berilgen 1 million sumlıq járdem shańaraǵımız ushın úlken súyenish boldı. Prezidentimizge hám usı iygilikli ilajda xızmet etip atırǵan bárshege minnetdarshılıq bildiremen.
Processte “Sociallıq qorǵawdıń birden-bir reestri” málimleme sistemasına kirgizilgen shańaraqlar, sonday-aq, dizimge kirgizilmegen, biraq materiallıq jaǵdayı boyınsha kem támiyinlengen, shańaraq aǵzalarınıń jan basına tuwra keletuǵın dáramatı minimal tutınıw qárejetleriniń 1,5 esesinen artpaytuǵın shańaraqlarǵa 1 million sumnan bir mártelik materiallıq járdem ajıratıldı. Qaraqalpaqstan Respublikası boyınsha 85 mıńǵa shamalas shańaraq dizimge alınǵan bolıp, olarǵa materiallıq járdem tayınlaw ushın 84 milliard 900 million sumnan aslam qarjı qaratıldı. Maǵlıwmat ushın, ótken jılı 74 mıńnan aslam shańaraqtıń hár birine 270 mıń sumnan 20 milliard sumǵa shamalas materiallıq járdem berilgen edi.
Sociallıq qorǵaw milliy agentligi tárepinen bank plastik kartası bar xalıqqa usı jıldıń 30-oktyabr kúni tólemler tolıq ótkerip berilgen bolsa, plastik kartası bolmaǵan shańaraqlarǵa naq pullar «kóshpeli kassalar» járdeminde jetkerip berildi. Bunda arnawlı málimleme konvertleri tayarlanıp, olarda járdem pulın beriw tártibi, energiyanı únemlew boyınsha usınıslar hám qarar tiykarındaǵı maǵlıwmatlar jaylasqan. Máhállelerge biriktirilgen sociallıq xızmetkerler bul konvertlerdi úyme-úy júrip xalıqqa jetkerip berdi. Bul materiallıq járdem pulları xalıq ushın qıstıń suwıq kúnlerinde ısıtıw qárejetlerin qaplawǵa mólsherlengen.
– Bul biziń shańaraǵımız ushın da úlken járdem boldı, – deydi usı máhálleniń jáne bir puqarası I topar mayıbı Xalmurat Atakeev. – Alınǵan pullardı elektr energiyası hám tábiyǵıy gaz ushın tólemlerge sarıplawdı rejelestirdik. Bunday itibar hám ǵamxorlıq ushın minnetdarmız.
Arzalardı qabıl etiw procesi oktyabr ayında juwmaqlanǵan bolıp, xalıqtıń múrájatların qabıllaw ushın agentlik janında 11-40 Call orayınıń xızmeti jolǵa qoyıldı. Házirgi waqıtta bolsa járdem belgilengen shańaraqlarǵa tólemlerdi jetkeriw jumısları tolıq juwmaqlanǵan.
– «Aydın jol» máhállesi boyınsha jámi 253 mútáj shańaraqqa járdem kórsetildi, – deydi “Aydın jol” mahallasi ijtimoiy xodimi Shınargúl Artıqbaeva. – Sonnan 73 i «Máhálle jetiligi»niń qararı tiykarında dizimge kirgizildi. Tiykarǵı itibar haqıyqatında da mútáj hám qıyın ahwaldaǵı shańaraqlarǵa qaratıldı.
Sonday-aq, usınday shańaraqlar ushın elektr hám tábiyǵıy gazdı bazalıq normadan artıq paydalanǵanda kompensaciyanı jıl dawamında tólep beriw sisteması engizilip, ótken jılı tek ǵana noyabr-fevral ayları ushın ámel etetuǵın edi. Bul sistema tolıq sanlastırılıp, bir márte berilgen arza menen 2027-jıldıń 1-apreline shekem kompensaciya tóleniwi belgilendi. Ótken dáwir ishinde usınday 114 mıń 816 arza kórip shıǵılıp, 23 mıń 131 shańaraqtıń bazalıq normadan artıq paydalanılǵan gaz hám elektr energiyası ushın 1 milliard 107 million sumnan aslam kompensaciya tólep berildi. Ótken jılǵı kórsetkishke salıstırǵanda bul járdemnen 6 mıńǵa kóbirek shańaraq paydalandı.

Qaraqalpaqstan xabar agentligi