ChatGPT paydalanıwshı 18 jasqa tolmaǵanınan gúmanlanǵanda, onnan pasport arqalı shaxsın tastıyıqlawdı soray basladı. Tekseriwden ótpegeninshe sistema “tek úlkenler ushın” dep belgilengen temalardı dodalaw imkaniyatın shekleydi. Ayırım jaǵdaylarda bul talap hátteki er jetken paydalanıwshılarǵa da qollanılmaqta – olardan biri 30 jasta bolsa da, tastıyıqlaw soralǵanın bildirgen.

OpenAI bul funkciyanıń basqıshpa-basqısh engizilip atırǵanın hám házirgi waqıtta tiykarınan inglis tilinde sóylesetuǵın aymaqlarda sınaq tárizinde qollanılıp atırǵanın tastıyıqladı. Kompaniyaǵa bola, jańalıqtıń maqseti jasqa baylanıslı sheklewlerge ámel etiw hám jas óspirimlerdi maqul bolmaǵan kontentten jáne de nátiyjeli qorǵaw bolıp esaplanadı.
Sonday-aq, OpenAI pasport maǵlıwmatları qáwipsizlik talaplarına tolıq ámel etken halda qayta islenetuǵının málim etti: maǵlıwmatlar shifrlanǵan tárizde jiberiledi, tek ǵana jastı tastıyıqlaw ushın qollanıladı hám hújjetler ashıq túrde saqlanbaydı.
Bul jańalıq auditoriya tárepinen túrlishe qabıl etildi. Ayırım paydalanıwshılar baslamanı sanlı qáwipsizlikti kúsheytiwge qaratılǵan logikalıq qádem sıpatında bahalaǵan bolsa, basqaları mexanizmniń artıqsha hám ayırım jaǵdaylarda nadurıs islewin atap ótip, tiykarsız sheklewlerge dus kelip atırǵanın sınǵa almaqta.
OpenAIdiń atap ótiwinshe, tekseriwdiń házirgi talqılawı sınaq xarakterine iye. Kompaniya paydalanıwshılardıń pikir-usınısların úyrenip, jastı tastıyıqlawdıń alternativ usılları – sonıń ishinde, bank kartaları yamasa elektron sanlı identifikatorlardan paydalanıw imkaniyatın kórip shıqpaqta.

Madinabonu NASRIEVA,
Uluǵbek TOXTAEV,
ÓzAnıń xabarshıları