Prezidentimiz Aqdárya rayonınıń Dahbed qalashasında jaylasqan Maxdumi Ázam kompleksinde ámelge asırılıp atırǵan rekonstrukciya jumısları menen tanıstı.

Mámleketimiz basshısı usı jıldıń mart ayında Samarqand wálayatına saparı waqtında Mahdumi Ázam zıyarat ornın abat etiwge baylanıslı joybar menen tanısqan edi.
Haslı házirgi Kasansay rayonında tuwılǵan sufiy alım naqshbandiya táliymatınıń basshılarınan biri bolǵan. Jas waqıtlarında Ferǵanadaǵı medresede sawat arttırıp, Samarqandta Xoja Ahrar Valiydiń shákirti máwlana Muhammed Qazıy qolında pir dárejesine jetedi. Keyin ala ózi tariqat ilimine baylanıslı 30 dan aslam shıǵarma jazǵan, kóplegen shákirtler jetistirgen.
Bul insanǵa ilim jolındaǵı xızmetleri ushın Maxdumi Ázam ataǵı beriledi. Ilim hám din jolındaǵı uzaq saparınan soń Samarqand wálayatında jerlengen.
Samarqand húkimdarı bolǵan Yalangtosh Bahodir Mahdumi Ázam qábiriniń ústinde mavzoley qurdırǵan, bul jerde iri meshit, ilim tárepdarları ushın medrese de qurdırǵan. Ol qaytıs bolǵannan soń óziniń wásiyatına bola, usı jerge jerlengen. Ulıwma, zıyarat ornında 50 den aslam qábir tas saqlanǵan bolıp, kópshiligi kimniń húrmetine qoyılǵanı anıqlanǵan. Bul jerde kóplegen ulamalar qatarında eki Awǵanstan húkimdarı (Shah Hidayat ibn Shah Qasim (1668-jıl), Shah Saodat ibn Shah Hidayat) ta jerlengen.
Oyshıl jerlengen zıyarat ornında joybar sheńberinde keń kólemli rekonstrukciya jumısları ámelge asırılmaqta.
Mahdumi Ázam zıyarat etiw ornınıń ulıwma maydanı derlik 5 gektardı quraydı. Bul jerge keliwshi zıyaratshılar da kóp. Olarǵa sharayatlardı jaqsılaw maqsetinde Mahdumi Ázam mavzoleyi janında úsh qabatlı zamanagóy avtomobil turıw ornı, kiriw dárwazası, hám hákimshilik imaratlar, taharatxana, mıń adamlıq meshit hám qosımsha áywanlar qurılmaqta.
Ońlaw jumıslarınan soń bir waqıttıń ózinde 35 mıń zıyaratshını qabıllaw imkaniyatı jaratıladı. Aldınları 5 mıń zıyaratshı qabıl etilgen.
Sonday-aq, aymaqta zıyaratshılarǵa qosımsha qolaylıq jaratıw maqsetinde abadanlastırıw jumısları alıp barılıp, 40 tan aslam sawda hám servis obektleri shólkemlestiriledi.
Oyshıldıń ruwxı eske alınıp, Quran oqıldı. Prezident zıyarat ornında terek ekti.
Zıyarat etiw ornın bunnan bılay da abadanlastırıw, baǵda ásirlerge tatıytuǵın terekler jaratıp, zıyaratshılar ushın qolaylıqlar jaratıw boyınsha tapsırmalar berildi.

ÓzA