Prezident Shavkat Mirziyoev sociallıq-ekonomikalıq reformalardıń processleri menen tanısıw hám keleshektegi wazıypalardı belsendilerdiń qatnasıwında belgilep alıw ushın 25-noyabr kúni Samarqand wálayatına keldi.

Mámleketimiz basshısı Samarqandqa saparın dástúrge bola, Imam Buxariy mavzoleyin zıyarat etiwden basladı. Quran oqılıp, pátiya etildi.
Prezidentimizdiń baslaması menen bul kompleks ullı muhaddis babamızdıń islam dúnyasında tutqan joqarı abırayına, úlken potencialına múnásip tárizde qaytadan qurıldı. Ulıwma maydanı 45 gektardı quraytuǵın aymaqta úlken maqbara, 10 mıń adamlıq meshit hám hákimshilik imaratı, muzey, kiriw hám shıǵıw áywanları qurıldı. Zıyarat etiw ornınıń tórt múyeshindegi 75 metrlik minaralar oǵan sawlat baǵıshlaǵan.
Bul jer tek zıyarat etiw emes, ilim-aǵartıwshılıq, tárbiya hám ibrat orayı bolıwı, Imam Buxariydiń ullı izlenisleri, bilimi hám jetikligi zıyaratshılar, ásirese, jaslar ushın jaqsı úlgi bolıwı kerek ekenligi itibarǵa alınıp, komplekste innovaciyalıq muzey shólkemlestirildi. Ol islam dúnyasında muhaddisler sultanı dep tán alınǵan Imam Buxariydiń ómirin hám ilimiy miyrasın, islam aǵartıwshılıǵınıń rawajlanıwına qosqan úlesin kórsetedi.
Kompleks aldın bir kúnde 12 mıń zıyaratshıǵa xızmet kórsetken bolsa, házir 65 mıń miymanǵa xalıqaralıq standartlarǵa sáykes xızmet kórsetiw imkaniyatı jaratılǵan.
Bunnan tısqarı, aymaqta Imam Buxariy xalıqaralıq ilimiy-izertlew orayı hám Hádis ilimi mektebi jaylasqan.
Zıyarat etiw ornı átirapında 570 milliard qarjı jumsalıp, miymanxanalar hám sawda-servis orınları shólkemlestirildi. Onda 1 tórt juldızlı, 2 úsh juldızlı hám 22 shańaraqlıq miyman úyi qurılǵan. Bul obektler tolıq kommunikaciya tarmaqları menen támiyinlenip, aymaǵı abadanlastırılǵan. 2026-jılǵa shekem aymaqta kóklemzarlastırıw jumısların ámelge asırıw hám avtomobiller turatuǵın orınlardı shólkemlestiriw rejelestirilgen.
Mámleketimiz basshısı Imam Buxariy zıyarat etiw ornı xalqımızdıń bay ruwxıy miyrası hám dóretiwshilik potencialınıń ayqın úlgisi bolǵanın atap ótip, komplekste házirgi waqıtta alıp barılıp atırǵan sońǵı abadanlastırıw jumısların sapalı hám óz waqtında orınlaw boyınsha juwapkerlerge tapsırmalar berdi.

ÓzA