Usı jıldıń 24-noyabr sánesinde qabıl etilgen “Tashkent qalasında ekologiyalıq jaǵdaydı jaqsılaw boyınsha keshiktirip bolmaytuǵın ilajlar haqqında”ǵı Prezident pármanına bola, arnawlı komissiya Tashkent qalasında qurılıs ushın ajıratılǵan 500 m2 hám onnan artıq maydanlarda tómendegi talaplar tiykarında kompleksli tekseriwdi ámelge asıradı:

– ulıwma maydanınıń 25 procenti kóklemzarlastırılǵanı;
– suw búrkiwshiler ornatılǵanı;
– kiriw-shıǵıw jollarında avtotransportlar dóńgeleklerin juwıw basseynleriniń qurılǵanı.
– qurılıs materialları hám turmıslıq shıǵındılardı tasıwda transportlardıń brezent yamasa PVX qaplamalı materiallardan tayarlanǵan tent penen jabılǵan halda háreketleniwi.
Sonday-aq, maydanı 1 000 kvadrat metrden artıq bolǵan qurılıs uchastkalarında fon monitoring stanciyaların ornatıw hám onı Ekologiya komitetine integraciyalaw qurılıstı dawam ettiriwdiń eń tiykarǵı shárti etip belgilenedi.
Shaxslar ózleri iyelik etip turǵan jer maydanı aymaǵındaǵı tereklerdi suwǵarıw maqsetinde ishimlik suwınan paydalanıw waqtına qoyılǵan sheklew (saat 00:00 den baslap, 05-00 ge shekem) báhár hám jaz máwsimlerinde biykar etiledi. Onda ishimlik suwınan basqa maqsetlerde paydalanıw boyınsha sheklew óz kúshinde qaladı. Kóp kvartiralı turaq jaylarǵa suwǵarıw ushın suw rezervuarların ornatıw ilajları kóriledi.
Pármanǵa bola, atmosfera hawasınıń PM 2,5 bóleksheleri menen pataslanıw dereklerin anıqlaw ushın Atmosfera hawasın tereń úyreniwge qaratılǵan arnawlı laboratoriya shólkemlestiriledi.
2026-jıl báhár hám gúz máwsimlerinde Tashkent qalasınıń 33 km. uzınlıqtaǵı kishi aylanba jolı boylap “Jasıl koridor” joybarı ámelge asırıladı.
2026-jıl 1-aprelge shekem “Jasıl Tashkent” master rejesi islep shıǵıladı.
Tashkent qalasınıń barlıq rayonlarında “jasıl”lıq dárejesi tómen bolǵan 3 ewden uzınlıǵı 5 km den kem bolmaǵan kóshelerdi tańlap alıw arqalı “Sayalı seyil kóshesi” shólkemlestiriledi.
Sonday-aq, isbilermenler hám puqaralar tárepinen turmıslıq hawa tazalaw úskeneleri (TIF TN kod 8509 80) Ózbekstan aymaǵına alıp kirilgende bajıxana bajısınan azat etiledi.

M.Qosimova, ÓzA