Ózbekstan Respublikası Prezidenti Administraciyasınıń basshısı Saida Mirziyoeva Administraciya hám tiyisli uyımlardıń basshılıǵı qatnasıwında Tashkent qalasındaǵı ekologiyalıq jaǵdaydı jaqsılaw boyınsha keshiktirip bolmaytuǵın ilajlar boyınsha májilis ótkerdi.

Sońǵı waqıtlarda baqlanıp atırǵan hawanıń pataslanıw dárejesi tereń táshwish oyatıp atırǵanı, paytaxt xalqın orınlı túrde qáweterge salıp atırǵanı, bul jaǵday jedel hám muwapıqlastırılǵan háreketlerdi talap etip atırǵanı atap ótildi.
Administraciya basshısı juwapkerlerdiń atmosfera hawasınıń házirgi jaǵdayı, puqaralardan kelip túsip atırǵan múrájatlar, jámiyetshiliktiń usınıs hám baslamaları haqqındaǵı esabatların tıńladı. Házirgi jaǵdayǵa tásir kórsetip atırǵan tiykarǵı faktorlar, adamlardıń densawlıǵı hám ekologiyaǵa unamsız tásirdi azaytıw jolları hár tárepleme kórip shıǵıldı.
Májiliste belgilengen normalar buzılǵan jaǵdaylarda hawanı pataslandırıp atırǵan óndiris orınlarına qarsı qatań ilajlar kóriw zárúrligi ayrıqsha atap ótildi. Adamlardıń salamatlıǵı haqqında sóz bolǵanda, mawasaǵa orın joq ekenligi hám bul princip mámleket ushın da, biznes ushın da birdey ámel etiwi kerek ekenligi atap ótildi.
Saida Shavkatovna usı kúnlerde operativ tártipte islep shıǵılǵan ekspert juwmaqlarına tiykarlanıp, jaqın, orta hám uzaq múddetli perspektivaǵa mólsherlengen, operativ ilajlardan baslap, keleshekte bunday jaǵdaylardıń qaytalanıwınıń aldın alıwǵa qaratılǵan sistemalı sheshimlerge shekem qamtıp alǵan kompleksli usınıslardı alǵa qoydı.
Atap aytqanda, Prezident Administraciyası basshısı tárepinen ekologiyalıq qadaǵalawdı kúsheytiw, pataslandırıwshı obektlerdiń jumısın sheklew, qurılısqa qoyılatuǵın talaplardı qatań saqlaw, qalanı keń kólemde kóklemzarlastırıw hám hawa sapasın qadaǵalawdıń zamanagóy sistemasın jaratıw boyınsha ilajlar belgilendi.
Bul ilajlar jaqın arada mámleketimiz basshısına kórip shıǵıw ushın usınılatuǵın Ózbekstan Respublikası Prezidenti Pármanınıń joybarı ushın tiykar bolıp xızmet etedi.

ÓzA