Húrmetli Prezidentimiz Shavkat Mirziyoevtiń basshılıǵında 19-noyabr kúni kámbaǵallıqtı qısqartıw hám xalıqtıń bántligin támiyinlew baǵdarındaǵı jumıslardıń juwmaǵı hám kelesi jıl ushın tiykarǵı wazıypalar boyınsha ótkerilgen videoselektor májilisinde húkimet, atqarıw hákimiyatı hám barlıq juwapkerlerge kámbaǵallıqtı qısqartıw máselesine itibardı tómenletpew zárúr ekenligin túsindirdi.

Kámbaǵallıqtı qısqartıw hám xalıqtıń bántligin támiyinlew tiykarǵı kún tártibinen shıqpay kiyatırǵan másele. Atap ótilgenindey, ótken dáwirde bul baǵdardaǵı jumıslardı tómende durıs shólkemlestiriw kerek. Máhálleme-máhálle júrip, jańa baslamalardı tawıp, adamlardıń turmısın jaqsılawǵa juwapker bolǵan hákimlikler hám olardıń xızmetkerleriniń materiallıq-texnikalıq imkaniyatları túp-tiykarınan jaqsılandı. Usı jıldıń basınan mútáj 302 mıń shańaraq kámbaǵallıqtan shıqtı. Jıl aqırına shekem kámbaǵallıq dárejesi 6 procentke shekem azayıwı kútilmekte. Birinshi márte 1 mıń 435 máhálle “kámbaǵallıqtan jıraq” aymaqqa aylandı. Sonıń menen birge, ayırım rayonlardıń hákimleri úlken resursı hám qarjısı bola turıp, jumıslardı óz halına taslap qoyǵanı, adamlarǵa imkaniyatına jarasa tayar joybar bermegenligi sınǵa alındı. Kelesi jılı kámbaǵallıq hám jumıssızlıq dárejesin 4,5 procentten azaytıw juwapkerlerdiń tiykarǵı wazıypası bolatuǵını atap ótildi. Onıń ushın kelesi jılı ekonomikaǵa 450 trillion sum kredit ajıratılatuǵını, 140 trillion sumı máhálledegi kishi hám orta joybarlar ushın beriletuǵını belgilendi.
Mámleketimiz basshısı bul jumıslardı shólkemlestiriwdiń tiykarǵı baǵdarların belgilep berdi. Birinshisi – qurılıs arqalı xalıqtı jumıslı hám dáramatlı etiw, ekinshi baǵdar – servis joybarların kóbeytip, xalıqtıń bántligin támiyinlew, úshinshi baǵdar – sanaat joybarları arqalı turaqlı jumıs orınların kóbeytiw, tórtinshi baǵdar – awıl xojalıǵı esabınan xalıqtıń dáramatların arttırıw, besinshi baǵdar – járdemge mútáj shańaraqlardıń sociallıq qorǵalıwın kúsheytiw etip belgilendi.
Prezidentimiz juwapkerlerge hár bir baǵdar boyınsha isleniwi tiyis bolǵan anıq wazıypalar hámde bul wazıypalardı orınlaw ushın zárúr qarjılardıń deregi de anıq kórsetip berildi. Bunnan tısqarı, awır turmıslıq jaǵday sebepli kámbaǵallıqqa túsip qalıw qáwpi joqarı bolǵan shańaraqlardı aldınnan anıqlap, olarǵa mánzilli járdem kórsetiw jolǵa qoyıladı.
Álbette, kámbaǵallıqtı qısqartıw ańsat hám birden bolatuǵın process emes. Eń áhmiyetlisi, mámlekettiń úlken resurs hám imkaniyatları usı baǵdarǵa jumsalıp atırǵan eken, bul baǵdardaǵı jumıslar sistemalı túrde alıp barılıwı, belgilengen hár bir ilaj óz ornında hám nátiyjeli orınlanıwı kerek.

Maxmud Esengelidiev,
Xalıq deputatları Shomanay rayonlıq Keńesiniń deputatı, ÓzXDP deputatlıq toparı basshısı.
Qaraqalpaqstan xabar agentligi