Ózbekstan Respublikası Ekologiya hám klimat ózgeriwi milliy komiteti hám Húkimet qararına muwapıq, barlıq qurılıs shólkemleri hám qorshaǵan ortalıqqa tásir kórsetiwshi kárxanalar atmosfera hawasın qorǵaw talaplarına qatań ámel etiwi shárt ekenligi qatań túrde bildirildi.

Qurılıs shólkemleri shań hám qumnıń hawaǵa kóteriliwine jol qoymawı, kiretuǵın jollarǵa suw búrkegishlerdi ornatıwı, avtotransport dóńgeleklerin juwıw ushın arnawlı shaqapsha shólkemlestiriwi hám maydanlardı qorǵaw tosıqları menen úskenelewi májbúriy esaplanadı. Bul talaplarǵa ámel etilmese, hákimshilik jaza ilajları qollanılıwı hám jumıs 10 jumıs kúnine shekem toqtatılıwı múmkin.
Sonıń menen birge, Prezident pármanı hám Ministrler Kabinetiniń qararına muwapıq, I hám II kategoriyaǵa kiretuǵın kárxanalar 2026-jılǵa shekem avtomatikalıq monitoring stanciyaları, nátiyjeli shań-gaz tazalaw úskeneleri hám sanitariyalıq qorǵaw zonalarında qadaǵalaw postların engiziwi shárt. Májbúriyatlar orınlanbasa, kompensaciya tólemleri 5 esege arttırıladı.
Nızamshılıqqa bola, meteorologiyalıq sharayatlar qolaysız bolıwı kútilgende kárxanalar zıyanlı shıǵındılardı azaytıwı shárt. Sonday-aq, 1-dekabrge shekem atmosferaǵa shıǵarılıp atırǵan pataslandırıwshı elementler muǵdarın 2 esege qısqartıw talabı qoyıldı.
Bul talaplar orınlanbaǵan jaǵdayda, kárxanalarǵa hákimshilik sharalar, jumıstı toqtatıw hám zárúr bolsa jınayıy juwapkershilik qollanılıwı múmkin.
Húkimet barlıq shólkemlerdi ekologiyalıq talaplarǵa sózsiz ámel etiwge shaqırdı, – dep málimleme beredi xabar.uz saytı.

Qaraqalpaqstan xabar agentligi