Ádillik ministrligi Insan aǵzaların transplantaciyalaw haqqında recipientler hám donorlarǵa medicinalıq juwmaqlar beriw boyınsha rejeni dizimnen ótkerdi (dizim nomeri: 3706, 21.11.2025 j.).

Usı Rejede recipient hám donorlardı medicinalıq tekseriwlerden ótkeriw hám transplantaciya ámeliyatı ushın medicinalıq juwmaqlar beriw tártibi belgilendi.
Rejege bola, recipient hám tiri donor medicina mákemelerinde 3 ay ishinde medicinalıq tekseriwlerden ótiwi kerek.
Medicinalıq tekseriw juwmaqlarına bola, transplantaciya ámeliyatına ruqsat beriw tek ǵana Húkimettiń 2024-jıl 13-iyundaǵı 333-sanlı qararında kórsetilgen mámleketlik medicina mákemeleriniń medicinalıq konsiliumı tárepinen ámelge asırıladı.
Medicinalıq konsilium recipientke insan aǵzaları hám (yamasa) toqımaları transplantaciyası ámeliyatına mútájligi, donorǵa bolsa transplantaciya ámeliyatına uqıplılıǵı haqqında medicinalıq juwmaq beredi yamasa beriwdi biykarlaydı.
Transplantaciya ámeliyatı insannıń kóriw, sóylew, esitiw qábiletiniń joǵalıwı yamasa psixikanıń buzılıwı, miynet qábiletiniń 33 procentten artıq turaqlı joǵalıwına sebep bolatuǵın tárizde zıyan jetkeriwine alıp keletuǵın bolsa recipient hám donorǵa medicinalıq juwmaq beriw biykar etiledi.

ÓzA