Oraylıq bank basqarmasınıń 2025-jıl 9-oktyabrdegi 25/1-sanlı qararı menen bank xızmetleri tutınıwshıları menen óz-ara qatnasıqlardı ámelge asırıwda kommerciyalıq banklerdiń jumısına qoyılatuǵın minimal talaplar haqqındaǵı rejege tiyisli qosımsha hám ózgerisler kirgizildi.

Oǵan bola, bankler finanslıq qıyınshılıqlar, qıyın turmıslıq jaǵdaylarǵa túsip qalǵan hám de fors-major jaǵdayları sebepli óz waqtında kredit tólemlerin ámelge asırıwǵa qıynalıp atırǵan tutınıwshılardıń ámeldegi kreditleri boyınsha kredit shártnaması shártlerine ózgeris hám qosımshalar kirgiziw imkaniyatları baǵdarındaǵı arzaların kórip shıǵıw tártibine iye bolıwı hám bul tártipti banktiń rásmiy veb-saytında jaylastırıwı shárt.
Bul tártip keminde tómendegilerdi óz ishine alıwı kerek:
– kredit shártnaması shártlerine ózgeris hám qosımshalar kirgiziw (restukturizaciya) túrleri (mısalı, kredit tólemleri múddetin sozıw, kredit procent stavkasın qayta kórip shıǵıw, kredit tólemlerin keshiktiriw ushın járiyma hám peniyalar muǵdarın azaytıw hám basqalar);
– kredit shártnaması shártlerine ózgeris hám qosımshalar kirgiziwge (restukturizciyalawǵa) tiykar bolatuǵın finanslıq qıyınshılıqlar, quramalı turmıslıq jaǵdaylar hám de fors-major jaǵdaylar dizimi;
– tutınıwshınıń arzaların qabıl etiw, dizimge alıw tártibi hámde arzaǵa qosımsha etiletuǵın zárúr hújjetler dizimi;
– tutınıwshınıń arzaların kórip shıǵıw múddetleri;
– qabıl etilgen arzalardı kórip shıǵıw hám bahalaw normaları;
– arza boyınsha bank tárepinen qabıl etilgen qarar haqqında tutınıwshıǵa xabar beriw tártibi hám múddeti;
– arza qanaatlandırılǵan jaǵdayda, kredit shártnaması hám onıń qosımshasına qosımshalar hám ózgerisler kirgiziw tártibi;
– arzanı qanaatlandırıwdı biykarlaw boyınsha qarar qabıl etilgende, bul haqqında arza beriwshige tiykarlanǵan túrde xabar beriw tártibi.
Onda usı tártipte hámiledarlıq hám tuwıw dem alısın alǵan hayal-qızlardıń ámeldegi kreditleri boyınsha tólemler múddetin on ayǵa shekem sozdırıw haqqındaǵı arzaların kórip shıǵıw boyınsha qaǵıydalar májbúriy túrde sáwleleniwi kerek, – dep málimleme beredi xabar.uz saytı.

Qaraqalpaqstan xabar agentligi