Pakistannıń jetekshi ǵalaba xabar quralları Tashkentte bolıp ótken Oraylıq Aziya mámleketleri basshılarınıń jetinshi Másláhát ushırasıwın keńnen sáwlelendirdi. Sonıń ishinde, oraylıq “Global News Pakistan”, “Daily Spokesman” “Islamabad Post” hám “Pakistan in the World” basılımlarınıń betlerinde Ózbekstan Prezidenti jańa formattaǵı regionallıq birge islesiwdiń tiykarǵı baǵdarların kórsetip bergenine ayrıqsha itibar qaratılǵan.

Maqalalarda mámleketimiz jetekshisi Ázerbayjan Másláhát ushırasıwları formatına tolıq huqıqlı aǵza sıpatında qosılǵanın qanaatlanıwshılıq penen járiyalaǵanı, bul qarar uqsas tariyx, tuwısqanlıq baylanısları, ruwxıy hám mádeniy jaqınlıq penen tıǵız baylanısqan xalıqlardıń mápine tolıq juwap beretuǵını atap ótilgen.
– Ózbekstan basshısı bul strategiyalıq qádem Másláhát ushırasıwlarına kúshli pát beretuǵınına, sawda-ekonomikalıq, investiciyalıq hám mádeniy-gumanitarlıq birge islesiwdi keńeytiwi, turaqlı rawajlanıw máseleleri boyınsha awızbirshilikte qararlar islep shıǵıw ushın jańa gorizontlar ashıwına isenim bildirdi, – dep jazǵan basılımlar.
– Tiykarında biz Oraylıq Aziya hám Qubla Kavkaz arasında bekkem kópir qurıp atırmız, birge islesiwdiń birden-bir mákanın qáliplestiriwge jol ashpaqtamız. Bul eki regionnıń strategiyalıq baylanıslılıǵı hám turaqlılıǵın kúsheytiwi sózsiz, – dep Prezident Shavkat Mirziyoevtiń sózlerinen citata keltirgen Pakistan ǴXQ.
Prezidenttiń bayanatında region dúnya ekonomikasına jedel integraciyalanıp atırǵanı, investiciyalıq tartımlılıǵı artıp atırǵanı, úshinshi bazarlarǵa eksport imkaniyatı keńeygeni hám tranzit potencialı ósip atırǵanı atap ótilgen. Ótken jılı region mámleketleri arasındaǵı sawda bahası 10,7 milliard dollarǵa jetti, Oraylıq Aziyaǵa kirgizilgen investiciyanıń ulıwma muǵdarı 17 procentke kóbeygen. Qáwipsizlik hám turaqlılıqtı támiyinlew, terrorizm, ekstremizm, transshegaralıq jınayatshılıq qáwip-qáterine qarsı gúresiw boyınsha sistemalı ilajlar kórilip atırǵanına ayrıqsha itibar berilgen.
Pakistan ǴXQnıń jazǵanınday, Shavkat Mirziyoev “Qıtay-Qırǵızstan-Ózbekstan” temir jolı hám Transawǵan transport koridorın regionlararalıq transport baylanıslılıǵınıń tiykarǵı joybarları sıpatında atap ótti.
Ózbekstan jetekshisi sóziniń juwmaǵında qabıl etilip atırǵan hújjetler hám alǵa qoyılıp atırǵan baslamalarda turaqlı, qáwipsiz hám abadan Oraylıq Aziyanı qurıwday ulıwma maqset jámlengenin atap ótken:
– Ayrıqsha atap ótpekshimen: biziń kúshimiz – birlikte, tabısqa qaray jolımız – doslıq hám birge islesiwde. Tek awızbirshilikli bolıp, óz-ara húrmet, tilekleslik hám strategiyalıq kózqaraslarǵa súyenip, iygilikli maqsetlerimizge erise alamız.

Ǵ.Xonnazarov, ÓzA