«Dawıtbay Qayıpov» atındaǵı jámiyetlik fondı hám Shımbay rayonı hákimliginiń baslaması menen Shımbay rayonındaǵı Mádeniyat sarayında Qaraqalpaqstan xalıq artisti, xalqımızdıń súyikli qosıqshısı Dawıtbay Qayıpovtıń dóretiwshiligine baǵıshlanǵan jas atqarıwshılardıń qatnasıwında XI Búlbilziban atlı respublikalıq tańlaw bolıp ótti.

Tańlawǵa D.Qayıpov dóretiwshiligine qızıǵıwshı háwesker qosıqshılar qatnasıp, eki kún dawamında ózlerin saxnada sınap kórdi. Qosıqshılardıń atqarıw sheberligi, saxna mádeniyatı tájiriybeli tóreshiler tárepinen múnásip túrde bahalanıp barıldı.
Qızıqlı ótken tańlaw juwmaǵında, birinshi orındı Qanlıkól rayonınan B.Bazarbaev jeńip alıwǵa miyasar boldı.
Sıylı ekinshi hám úshinshi orınlardı shımbaylı Í.Begdullaev hám Q.Xojaniyazovlar iyelewge eristi.
– Bul tańlawǵa bir neshe jıllardan berli qatnasıp kiyatırman, – deydi tańlaw jeńimpazı B.Bazarbaev. – Tańlawǵa respublikamızdıń barlıq aymaqlarınan talantlı jas qosıqshılar qatnastı. Mine solar arasında birinshi orındı iyelegenimnen oǵada quwanıshlıman. Bul meniń ushın úlken motivaciya boldı.
Tańlaw sońında jeńimpazlar shólkemlestiriwshiler tárepinen tayarlanǵan arnawlı diplom hám estelik sawǵalar menen sıylıqlandı.

Adilbay Orazov,
Qaraqalpaqstan xabar agentligi sholıwshısı.