Ózbekstan Respublikası Suw xojalıǵı ministri Shavkat Hamroev hám Franciyanıń mámleketimizdegi Ayrıqsha hám tolıq huqıqlı elshisi Ualid Fuk arasında ushırasıw bolıp ótti.

Sóylesiw dawamında tárepler suw xojalıǵı tarawındaǵı bir qatar perspektivalı joybarlar hám strategiyalıq sheriklik baylanıslarınıń ústinligine itibar qarattı.
Atap ótilgenindey, Ózbekstan hám Franciya arasındaǵı birge islesiw eki mámleket basshıları qol qoyǵan deklaraciya tiykarında izbe-iz rawajlanbaqta. Sonıń ishinde, suw xojalıǵı tarawında da bir qatar perspektivalı joybarlar ámelge asırılmaqta. Qaraqalpaqstandaǵı “Súwenli” kanalınıń irrigaciya sistemasın qayta qurıw birgeliktegi joybarı olardan biri bolıp esaplanadı. Ulıwma bahası 150 million AQSh dolların quraytuǵın bul baslama Franciya rawajlanıw agentligi hám Evropa investiciyalıq banki tárepinen qarjılandırılmaqta.
Bul joybar Qaraqalpaqstan Respublikasında suw resursların nátiyjeli basqarıw, suwdan paydalanıw mádeniyatın arttırıw, awıl xojalıǵı eginlerinen mol hám sapalı zúráát alıw, xalıqtıń turmıs dárejesin jaqsılawda úlken áhmiyetke iye.
Ministrlik málimleme xızmetiniń málim etiwinshe, sóylesiw juwmaǵında tárepler suw xojalıǵın modernizaciyalaw, joybarlardı ámelge asırıw hám qánigeler arasında tájiriybe almasıw sıyaqlı bir qatar máseleler boyınsha birge islesiwdi bekkemlewge kelisip aldı.

N.Ziyodullaeva, ÓzA