Samarqandta óz jumısın baslaǵan “CITES CoP20” konferenciyasınıń strategiyalıq tásirin kúsheytiwge qaratılǵan joqarı dárejedegi sóylesiw sheńberinde Ózbekstan Respublikası, Qazaqstan Respublikası, Qırǵız Respublikası hám Tájikstan Respublikası arasında Oraylıq Aziyada jabayı fauna hám flora resurslarınan turaqlı paydalanıwdı qollap-quwatlaw hám jabayı haywanlardıń nızamsız sawdasına qarsı gúresiw boyınsha 2026-2032-jıllarǵa mólsherlengen Samarqand deklaraciyası hám regionallıq birge islesiw rejesine qol qoyıw máresimi bolıp ótti.

Traffic International menen birgelikte islep shıǵılǵan deklaraciya hám háreketler rejesi Oraylıq Aziya mámleketleri jasaw orınlarınıń joǵalıwı, klimat ózgeriwi, brakonerlik hám jabayı haywanlardıń nızamsız sawdası menen baylanıslı regionnıń biokóptúrliligine barǵan sayın artıp atırǵan qáwip-qáterlerdi birgelikte sheshiwge sadıqlıǵın sáwlelendiredi.
Hújjette milliy qorshaǵan ortalıq, bajıxana, huqıq qorǵaw hám sud uyımları arasındaǵı birge islesiwdi bekkemlew, jabayı haywanlar menen baylanıslı jınayatlarǵa qarsı gúresiw boyınsha milliy jumısshı toparlardı dúziw, málimleme almasıwdı jaqsılaw hám zamanagóy monitoring texnologiyaların alǵa qoyıw názerde tutılǵan.
Regionallıq birge islesiw áhmiyetli maǵlıwmatlardıń turaqlı almasıwı, birgeliktegi qadaǵalaw mexanizmlerin islep shıǵıw, nızamsız sawdaǵa qarsı gúresiw ushın regionallıq tarmaqtı jaratıw hám shegara aymaqlarında muwapıqlastırılǵan háreketler arqalı bekkemlenedi. Bunnan tısqarı, mámleketler jabayı haywanlardıń nızamsız sawdasına qarsı gúresiw, ekosistemanı tiklew, siyrek ushırasatuǵın túrlerdi qorǵaw, qánigelerdiń mamanlıǵın arttırıw, ekoturizmdi rawajlandırıw hám jergilikli jámiyetshiliklerdiń tábiyattı qorǵaw baslamalarında qatnasıwın óz ishine alǵan hám turaqlı ekonomikalıq sheshimlerdi qollap-quwatlaytuǵın birden-bir strategiyalıq tiykardı islep shıǵıw hám ámelge asırıwǵa kelisip aldı.
Samarqand deklaraciyasınıń qol qoyılıwı Oraylıq Aziya mámleketleri regionnıń biybaha tábiyǵıy miyrasın saqlap qalıw, ekologiyalıq turaqlılıq, sociallıq integraciya hám ekonomikalıq rawajlanıwdıń úylesimliligin támiyinlew ushın birgelikte háreket etetuǵının atap ótedi.

ÓzA