AQShtıń Tashkenttegi elshixanasınıń málim etiwinshe, jańadan shólkemlestirilgen Amerika-Ózbekstan isbilermenlik hám investiciya keńesiniń járdemshi baslıǵı sıpatında AQSh tárepinen Qubla hám Oraylıq Aziya boyınsha Arnawlı wákil, elshi Serjio Gor járdemshi basshılıq etedi.

Aldın Ózbekstan tárepinen Prezident Administraciyası basshısı Saida Mirziyoeva járdemshi baslıq bolatuǵını járiyalanǵan edi.
“Keńes AQSh hám Ózbekstannıń investiciya hám eksport imkaniyatların keńeytiw, AQSh texnologiyaları hám talantları ushın joqarı rawajlanıp atırǵan tarawlardı, ásirese, IT hám sanlı innovaciyalardı jolǵa qoyıw; hám AQSh eksportshıları ushın teń báseki ortalıǵın rawajlandırıwǵa ayrıqsha itibar qaratadı,” – delinedi AQSh elshixanası xabarında.
Prezident Shavkat Mirziyoev qol qoyǵan pármanda usı Keńestiń kórip shıǵıwı ushın kirgiziletuǵın tómendegi máselelerdi islep shıǵıw tiykarǵı esaplanatuǵını belgilengen edi:
(a) strategiyalıq biznes baslamaları, iri investiciya hám sawda joybarlarınıń islep shıǵılıwı hám kelisimin muwapıqlastırıw, sonday-aq, olardıń ámelge asırılıwın turaqlı monitoring etiw;
(b) Ózbekstanǵa qosımsha investiciyalardı tartıw ushın arnawlı investiciya fondın jaratıw, iri investorlar sıpatında Xalıqaralıq finanslıq rawajlanıw korporaciyasın (DFC) hám Ózbekstan tárepinen de investorlardı belgilew, sonday-aq, áhmiyetli infrastrukturalıq hám strategiyalıq joybarlardı qarjılandırıw hám qáwip-qáterlerdi bólistiriw ushın iri finans institutların (YaTB, XMK, ADB) tartıw;
(v) tarif stavkaların óz ara tómenletiw máseleleri boyinsha sóylesiwlerdi dawam ettiriw;
(g) Programmalıq ónimler hám málimleme texnologiyaları texnologiyalıq parki (IT -park) rezidentleri bolgan kompaniyalar ónimleri hám xızmetlerin sistemalı túrde alǵa súriw;
(d) mámlekettiń investiciya portfelin, soniń ishinde, Ózbekstan Respublikası Oraylıq banki valyuta rezervleriniń bir bólegin hám basqa aktivlerdi diversifikaciyalaw boyınsha usınıslar kirgiziw.

ÓzA