Qaraqalpaqstan Respublikası «Pedagogikalıq sheberlik orayı»nda “Korrupciyaǵa qarsı gúresiw – aydın keleshegimizdiń tiykarı” atamasında ashıq pikirlesiw hám ashıq esikler kúni ótkerildi.

Oǵan Qaraqalpaqstan Respublikası Ádillik ministrliginiń bas másláhátshisi M.Xojaxmedova, Ózbekstan «Adolat» social-demokratiyalıq partiyası Qaraqalpaqstan Respublikası Keńesi baslıǵınıń orınbasarı Sh.Tóreshova, oraydıń kafedra baslıqları, professor-oqıtıwshılar hám tıńlawshılar, «Adolat» SDP Qaraqalpaqstan Respublikası Keńesi aǵzaları qatnastı.
Ilajdı Qaraqalpaqstan Respublikası “Pedagogikalıq sheberlik orayı”nıń “Sociallıq-ekonomikalıq pánler metodikası” kafedrasınıń aǵa oqıtıwshısı Adilbay Shırazov alıp bardı. Ushırasıwda atap ótilgenindey, hár qanday rawajlanıwdıń tamırına balta uratuǵın illetlerden biri korrupciya bolıp esaplanadı. Mámleketimizde bunday illetlerge qarsı gúresiw, olardıń aldın alıw máselesine ayrıqsha itibar qaratılıp, bul baǵdardaǵı nızamshılıq bazası da jetilistirilmekte.
Usı tiykarda puqaralardıń juwapkershiligi de arttırılmaqta. Atap aytqanda, usı jıldıń 5-mart kúni Ózbekstan Respublikası Prezidenti Sh.Mirziyoev Korrupciyaǵa qarsı gúresiw milliy keńesiniń májilisinde qatnasıp, “Korrupciya – reformalar jolındaǵı eń úlken tosqınlıq” ekenin atap ótken edi.
Ilajda dámegóylik, para alıw hám beriw, belgili bir sawǵa esesine adamlardıń huqıqları menen máplerine qayshı háreket etiw ámeldegi nızamshılıq tiykarında qadaǵan etiletuǵını, eger, usınday jaǵdaylar anıqlanatuǵın bolsa, jınayıy juwapkershilikke tiykar bolatuǵını anıq mısallar menen atap ótildi. Ushırasıwda tarawlarda korrupciyalıq jaǵdaylarǵa qarsı gúresiw baǵdarında ámelge asırılıp atırǵan huqıqıy-operativ ilajlardan tayarlanǵan videorolik qatnasıwshılar itibarına usınıldı.

Adilbay Orazov,
Qaraqalpaqstan xabar agentligi sholıwshısı