Respublikamızda házirgi waqıtta 289 mıń 527 xojalıq tábiyǵıy gazden paydalanadı. Al, alıs awıllıq elatlı punktlerdegi, yaǵnıy, tábiyǵıy gaz jetip barıwı qıyın sanalǵan aymaqlarda 100 mıń 489 xojalıq suyıltılǵan gazge beyimlestirilgen.

Bunnan tısqarı 121 mektepke shekemgi bilimlendiriw mákemesi suyıltılǵan gaz ballonnan paydalanıp kelmekte.
Búgingi kúni suyıltılǵan gaz támiynatı sanlastırılıp, «E-Gaz» baǵdarlaması boyınsha jumıslar jolǵa qoyılǵan.
– Bul alıs aymaqlardaǵı tutınıwshılardı úzliksiz suyıltılǵan gaz benen támiyinlewde «Hududgaz Qaraqalpaqstan» gaz támiynatı filialı tárepinen barlıq sharayatlar jaratılǵan bolıp, tutınıwshılarǵa óz waqtında 30-35 kún aralıǵında suyıltılǵan gaz ballonlar jetkerip berilmekte, – deydi Nókis rayonlıq gaz támiynatı bólimi suyıltılǵan gaz xızmetiniń baslıǵı Tursınbay Qutekeev.
Nókis rayonı aymaǵındaǵı Baqanshaqlı, Qırantaw, Arbashı, Kerder, Taqırkól hám Aqterek awıl puqaralar jıyınlarında jasawshı 1771 xojalıq suyıltılǵan gazge beyimlestirilgen. Bul xojalıqlardı úzliksiz suyıltılǵan gaz ballonları menen támiyinlew ushın, olar aylanba usılda paydalanılatuǵın 3216 gaz ballon menen támiyinlengen. Tutınıwshılar tolıǵı menen ID kartalar menen támiyinlengen bolıp, tólemler «E-Gaz» baǵdarlaması arqalı alıp barıladı.
Usı jıldıń 1-noyabr jaǵdayına rayonnıń suyıltılǵan gaz tutınıwshılarına 254,98 tonna fond ajıratılıp, ámelde 254,82 tonna suyıltılǵan gaz paydalanıwshılarǵa jetkerip berildi.
Óz waqtınada alıp barılıp atırǵan gaz támiynatındaǵı jumıslardan suyıltılǵan gaz tutınıwshıları minnetdar bolmaqta. Aldımızdaǵı ayazlı kúnlerde de gaz támiynatı menen baylanıslı mashqalalar bolmaydı, dep isenim bildiremiz.

Á.Jiyemuratov,
Qaraqalpaqstan xabar agentligi