Ulıwma orta bilim beriw mektepleriniń oqıwshıları arasında ullı jadid ilimpaz, jazıwshı hám oyshıllarımızdıń bay ádebiy miyrasın keńnen úgit-násiyatlaw, ósip kiyatırǵan jas áwladlardıń ruwxıy dúnyasın bayıtıw maqsetinde “Jadidler izinen” respublikalıq tańlawınıń Qaraqalpaqstan Respublikalıq basqıshı bolıp ótti.

Oǵan respublikamızdıń barlıq aymaqlarınan usı tańlawdıń qalalıq hám rayonlıq basqıshlarında jeńimpaz bolǵan oqıwshılar qatnasıp, belgilengen shártler boyınsha óz-ara bellesti.
Oqıwshılardıń aqıl-oyı, zeyini hám dóretiwshilik qábiletleri sınnan ótken tańlaw juwmaǵında, 6-7-8-klass oqıwshıları arasında, birinshi orındı Beruniy rayonındaǵı 42-sanlı mekteptiń oqıwshısı Nargiza Abdukarimova iyelewge miyasar boldı.
Tańlawdıń sıylı ekinshi hám úshinshi orınları Qanlıkól rayonındaǵı 8-sanlı mektep oqıwshısı Mırzabek Jumanov hám Ámiwdárya rayonındaǵı 39-sanlı mektep oqıwshısı Dilichexra Eshbaevalarǵa nesip etti.
9-10-klass oqıwshılar arasında bolsa, Ellikqala rayonındaǵı 70-sanlı mekteptiń oqıwshısı Sahiba Karimbaeva tańlawdıń barlıq shártlerinde joqarı ball toplap, birinshi orındı jeńip aldı.
Nókis rayonındaǵı 22-sanlı mekteptiń oqıwshısı Gózzal Doshbaeva hám Xojeli rayonındaǵı 22-sanlı mekteptiń oqıwshısı Asemay Artıqbaevalar bolsa, ekinshi hám úshinshi orınlarǵa ılayıq dep tabıldı.
Tańlaw sońında jeńimpazlar Qaraqalpaqstan Respublikası Mektepke shekemgi hám mektep bilimlendiriw ministrliginiń diplom hám estelik sawǵaları menen sıylıqlandı.

Adilbay Orazov,
Qaraqalpaqstan xabar agentligi sholıwshısı.