Milliy mádeniyatımız hám kórkem ónerimizdiń belgili ǵayratkeri, belgili rejissyor hám telebaslawshı, Ózbekstanda xızmet kórsetken mádeniyat xızmetkeri Mirabbos Abdulhaqovich Mirzaahmedov bıyıl 19-noyabr kúni 84 jasında qaytıs boldı.

M.Mirzaahmedov 1941-jılı 30-sentyabrde Tashkent qalasında ziyalı shańaraǵında tuwıldı. Orta mektepti tamamlaǵannan soń Tashkent teatr hám xudojnikler institutı (házirgi Ózbekstan mámleketlik kórkem óner hám mádeniyat institutı) nda kino hám teatr kórkem óneri aktyorı qánigeligi boyınsha bilim aldı.
Miynet jolın Ózbekstan teleradiokompaniyasında rejissyor járdemshisi sıpatında baslaǵan talantlı kórkem óner ǵayratkeri 60 jıldan aslam waqıt dawamında “Yoshlar” redakciyasınıń rejissyori, bas rejissyori, “Wzbekiston” telekanalınıń joqarı kategoriyalı rejissyori, “Otalar swzi – aqlning kwzi” kórsetiwiniń rejissyori hám baslawshısı sıyaqlı lawazımlarda nátiyjeli xızmet etti. Onıń tikkeley basshılıǵında áhmiyetli tema hám janrlarda tayarlanǵan esittiriw hám kórsetiwler, kórkem videofilmler milliy ruwxı, tereń mazmunı, xalıqshıllıǵı menen millionlaǵan ıqlasbentlerdiń kewlinen orın aldı. Ásirese, ustaz rejissyor tárepinen súwretke alınǵan “Báhár qaytpaydı,” “Izleymen,” “Qálbińe qulaq sal,” “Bahs,” “Úsh tamır,” “Dúnyanıń isleri” sıyaqlı shıǵarmalar óz dáwiriniń jarqın telefilmleri sıpatında mádeniyatımız ǵáziynesinen múnásip orın iyeledi.
M.Mirzaahmedov óziniń nuraniy hám danıshpan kelbeti, kóp jıllıq bilim hám tájiriybesi menen oraylıq telekanallarımız arqalı 40 jıldan berli kórsetilip kiyatırǵan “Atalar sózi – aqıldıń kózi” kórsetiwine jańasha ruwx hám mazmun alıp kirdi hám usı baǵdarlama arqalı jámiyetimiz turmısındaǵı sociallıq-ruwxıy mashqalalarǵa jámiyetshiliktiń itibarın qaratıw, el-xalqımız, ásirese, jaslar arasında shańaraq hám Watanǵa muhabbat, ádep-ikramlılıq, miyrim-shápáát ideyaların úgit-násiyatlawǵa úlken úles qostı.
Pútkil ómir boyı bárqulla izlenip, xalqımızǵa shın kewilden xızmet etip kelgen miynetkesh dóretiwshi ózine tán sheberlik hám tájiriybe mektebin jaratıp, kóplegen jaslarǵa ustazlıq etti.
M.Mirzaahmedovtıń mámleketimiz mádeniyatı hám kórkem ónerin rawajlandırıw jolındaǵı xızmetleri mámleketimiz tárepinen múnásip sıylıqlandı. Ol “Ózbekstan Respublikasına xızmet kórsetken mádeniyat xızmetkeri” húrmetli ataǵı, “Mehnat shuhrati” hám “Dwstlik” ordenleri menen sıylıqlandı.
Belgili kórkem óner ǵayratkeri, haq kewil hám kishipeyil insan, jaslardıń mehriyban ustazı Mirabbos Mirzaahmedovtıń esteligi kewillerimizde máńgi saqlanıp qaladı.

Sh.Mirziyoev, T.Norboeva, N.Ismoilov,
A.Aripov, S.Turdiev