Usı jıl 4-noyabrde Densawlıqtı saqlaw ministriniń “Densawlıqtı saqlaw tarawında “sırlı qarıydar” institutın engiziw haqqında”ǵı buyrıǵı qabıl etilgen. Sonday-aq, “sırlı qarıydar” tárepinen monitoring ótkeriwdiń anıq maqsetleri, parametrleri, obektleri hám normaların qamtıp alǵan Reje de tastıyıqlanǵan.

Densawlıqtı saqlaw ministrligi baspasóz xızmetiniń málim etiwinshe, bul túrdegi monitoring Densawlıqtı saqlaw ministrligi oraylıq apparatınıń strukturalıq bólimleri (zárúrlikke qarap onıń uyımları, shólkemleri hám mákemeleri) tárepinen shólkemlestiriledi.
Ilaj procesinde huqıqbuzarlıqlardı hámde wákillikten paydalanıwǵa shaqırıwshı usıllardı qollanıw qadaǵan etiledi.
Bul ilaj hákimshilik tártip-qaǵıydalardıń ámelge asırılıwı, densawlıqtı saqlaw strukturaları hám olardıń xızmetkerleri tárepinen medicinalıq xızmetlerdi kórsetiwde nızamshılıq talabına ámel etiliwi, xızmetkerlerdiń sheberligi hám operativligi jáne olardıń xalıq penen sóylesiw etiketi dárejesin bahalaw imkaniyatın beredi.
Maǵlıwmatlardı toplaw ushın haqıqıy qarıydar kórinisindegi “sırlı qarıydar” dan paydalanıladı.
“Sırlı qarıydar” úyreniwleri tek ǵana mákemege barǵan halda emes, al telefon qońırawı, elektron pochta múrájatı hám basqa usıllar arqalı da ámelge asırılıwı múmkin.
Úyreniw nátiyjeleri tiyisli túrde rásmiylestiriledi hám anıqlanǵan nızambuzıwshılıqlar boyınsha akt ol usınılǵan kúnnen baslap bes jumıs kúni dawamında Ádep-ikramlılıq komissiyası tárepinen kórip shıǵıladı. Eger huqıqbuzarlıq jaǵdayı bar bolsa, ayıpker xızmetkerdiń juwapkershilik máselesi kórip shıǵıladı, eger jınayat belgileri anıqlansa, materiallardı huqıq qorǵaw uyımlarına jiberiw haqqında qarar qabıl etiledi.
Ministrlik, óz gezeginde, puqaralardan medicina mákemelerinde korrupciyaǵa baylanıslı jaǵdaylarǵa dus kelse, “1203” qısqa nomerine yamasa t.me/ssvantikor_bot telegram botına múrájat etiwdi soramaqta. Múrájat etiwshiniń shaxsı sır saqlanıwı kepillenedi, – dep málimleme beredi xabar.uz saytı.

Qaraqalpaqstan xabar agentligi