Ózbekstan Ilimler akademiyası Shıǵıstanıw institutı Ábiw Rayxan Beruniy atı menen atalıp, ilimpazdıń shıǵarmaları awdarmalar hám basılımlar arqalı izbe-iz úyrenip kelinbekte. Atap aytqanda, zaman talaplarına muwapıq, institutta Beruniy miyrasın sanlastırıw hám onı dúnya ilimiy jámiyetshiligi ushın ashıq elektron platforma kórinisinde usınıw boyınsha ámeliy joybar ámelge asırıldı.

Joybar sheńberinde Ullı Britaniya, Germaniya, Niderlandiya, Túrkiya, Franciya, Iran hám Hindstan sıyaqlı mámleketlerde saqlanıp atırǵan qoljazbalardıń elektron nusqaları jıynalıp, olardıń inglis tilindegi ilimiy sıpatlamaları menen birge Heritage of Beruni saytına jaylastırıldı.
Portal 43 shıǵarmaǵa baylanıslı 172 qoljazbanıń 12 tomlıq ilimiy klassifikaciyasın, sonday-aq, Beruniydiń ómiri hám sayt haqqındaǵı maǵlıwmatlardı óz ishine aladı.
Usı tiykarda institut qoljazbalar fondında arnawlı sanlı “Beruniy toplamı” qáliplestirildi. Joybar sheńberinde ámelge asırılǵan jumıslar haqqında institut direktorı, professor Bahrom Abduhalimovtıń “Scientific heritage in a digital format” atamasındaǵı maqalası The UNESCO Courier jurnalında basıp shıǵarıldı.
ÓzR IA Málimleme xızmetiniń maǵlıwmatına bola, keleshekte Rossiya hám arab mámleketlerinde saqlanıp atırǵan qoljazbalardı da usı sistemaǵa qamtıp alıw rejelestirilgen.

M.Eshmirzaeva,
ÓzA