Búgin Nókis qalasındaǵı 55-sanlı ulıwma bilim beriw mektebinde «Keleshek saatı» sheńberinde «Ózbekstan bayraǵı» temasına baǵıshlanǵan ruwxıy-aǵartıwshılıq sabaq shólkemlestirildi.

Sabaq procesinde Qaraqalpaqstan Respublikası Mektepke shekemgi hám mektep bilimlendiriwi ministri Gúlistan Kojabaeva, ministr orınbasarı Qadirbay Ismayılov, Qaraqalpaqstan Respublikası prokurorınıń úlken járdemshisi Beket Aǵıtaev oqıwshılarǵa mámleketlik bayraqtıń mámleket tımsalı sıpatındaǵı ornı hám áhmiyeti haqqında tolıq maǵlıwmat berdi.
Ilajda Ózbekstan Respublikası mámleketlik bayraǵı xalqımızdıń kóp ásirlik tariyxı, bay ruwxıy miyrası hám milliy ózligimizdi jámlestiretuǵın áhmiyetli tımsal ekeni atap ótildi. Sonday-aq, bayraq mámleketimizdiń dúnya jámiyetshiligindegi múnásip ornın belgileytuǵın belgi sıpatında ayrıqsha atap ótildi.
Bunnan tısqarı, 20-noyabr – «Jer júzilik balalar kúni» múnásibeti menen bala huqıqların qorǵaw, Bala huqıqları haqqındaǵı konvenciya principleri hám onıń globallıq rawajlanıw maqsetleri menen baylanıslılıǵı boyınsha da oqıwshılarǵa kóplegen maǵlıwmatlar jetkerildi.
Mámleketlik nıshanlarǵa húrmet, Watanǵa sadıqlıq sezimlerin kúsheytiw, sonday-aq, bala huqıqların húrmet etiwge baylanıslı bilim hám túsiniklerdi bekkemlewge qaratılǵan bul aǵartıwshılıq sabaq barlıq qatnasıwshılarda úlken tásir qaldırdı.

Adilbay Orazov,
Qaraqalpaqstan xabar agentligi sholıwshısı.