Ájiniyaz atındaǵı Nókis mámleketlik pedagogikalıq institutı Mektepke shekemgi hám baslawısh tálim fakultetinde 14-noyabr – Xalıqaralıq logopedler kúni múnásibeti menen bayram ilajı hám student-jaslar tárepinen tayarlanǵan kórgizbe bolıp ótti.

Ilajda shıǵıp sóylegenler logopedler tek ǵana sóylewdegi kemshiliklerdi saplastıratuǵın qánigeler emes, sonıń menen birge, balanıń psixologiyalıq jaǵdayın qollap-quwatlaytuǵın, ózine bolǵan isenimin qáliplestiretuǵın hám oqıw procesindegi tabıslarında áhmiyetli orınǵa iye bolǵan pedagoglar ekenin atap ótti.
Keshe sheńberinde arnawlı pedagogika: logopediya tálim baǵdarı studentleri arasında innovaciyalıq bilimlendiriw texnologiyaları, kitapqumarlıqtı úgit-násiyatlaw, sonday-aq, oqıtıw procesinde zamanagóy kórgizbeli qurallardan paydalanıw sıyaqlı shártler tiykarında tańlaw shólkemlestirildi. Bul bolsa studentlerdiń sabaq dawamındaǵı teoriyalıq bilimlerin bekkemlewge xızmet etti.
– Aytıp ótiw kerek, bul bayram balalar sóylewin rawajlandırıw, bilimlendiriw hám sociallıq reabilitaciya tarawında pidayılıq penen xızmet etip atırǵan logoped qánigelerdiń miynetin qádirlew, olardıń jámiyettegi ornı hám áhmiyetin arttırıwǵa xızmet etedi, – deydi NMPI assistent oqıtıwshısı Azizbek Tájimuratov. – Keleshekte bolajaq logopedler ushın búgingi ilaj úlken master-klass boldı. Sebebi, institutımızdıń Mektepke shekemgi tárbiya hám defektologiya kafedrası tárepinen tájiriybeli qánigeler, professor-oqıtıwshılar qatnasıwı támiyinlendi.

Qaraqalpaqstan xabar agentligi