AQSh Prezidenti Donald Tramp birinshi márte Epshteyn faylları tolıq járiyalanıwın qollap-quwatladı. Bul burınǵı, maǵlıwmatlardıń járiyalanıwı sheklengen qatnasqa salıstırǵanda keskin burılıs bolıp esaplanadı.

Wákiller palatası usı háptede “Epstein Files Transparency Act” boyınsha dawıs beredi. Nızam qabıl etilse, Ádillik ministrligi Jeffri Epshteyn menen baylanıslı barlıq sır bolmaǵan hújjetler – xat jazısıw, bank almasıwı, tergew materialı, rásmiy xat hám 20 jıl dawamında jıynalǵan federal maǵlıwmatlardı keń jámiyetshilikke usınıwı shárt.
Usı fayllar Epshteynniń siyasatshı, biznesmen hám belgili shaxslar menen múnásibeti, sonday-aq, federal tergew qalay júrgizilgeni haqqında juwmaq shıǵarıwı múmkin. Sonıń ushın da process jámiyetshilik hám siyasiy maydan ushın oǵada áhmiyetli.
Sońǵı háptelerde demokratlar Epshteyn hám Gislayn Maksvelldiń Tramp haqqında jazısqan xatlarınan ibarat bir neshe elektron jazıspa tekstin járiyaladı. Buǵan juwap retinde respublikashılar 20 000 betlik hújjet toplamın tarqatıp, tiykarǵı básekileslerin “tańlap alınǵan materiallar menen siyasiy narrativ jaratıp atır”, dep ayıpladı.
Tramptıń kózqarasınıń keskin ózgeriwi – partiya ishinde júzege kelgen basım sebepli júz berdi: 100 ge shamalas respublikashı fayllardı járiyalaw tárepdarı ekenin bildirmekte. Sonıń menen birge, Epshteyn qurbanları hám olardıń shańaraqları da Kongresske múrájat etip, tolıq ashıq-aydınlıqtı talap etpekte. Bul jaǵday dawıs beriw waqtında kúshli ádep-ikramlılıq basımın júzege keltirip atır.

Musulmon Ziyo, ÓzA