“Ynet”basılımınıń jazıwınsha, Hind-Tınısh okeanı regionında jańa suwıq urıs kúsheymekte. Atap aytqanda, Qıtay áskeriy potencialın arttırıw maqsetinde Ekinshi jer júzilik urıstan keyingi dáwirde eń kúshli háreket baslaǵanı aytılmaqta. CHin mámleketi armiyanı jetilistirip, raketa hám yadro imkaniyatın júdá tez keńeytpekte. AQShtıń esap-sanaǵına bola, Pekin 2027-jılǵa kelip Tayvandı áskeriy kózqarastan iyelep alıwǵa tayar turıwdı qáleydi.

QXR Baslıǵı Si Czinpin Xalıq azatlıq armiyasın reformalamaqta, korrupciyaǵa qarsı oǵada keskin gúres alıp barmaqta, teńiz flotı, hawa hám raketa kúshlerin jetilistiriw ushın rekord muǵdarda qarjı jumsamaqta. Mámleket jańa ballistikalıq raketalar, úshinshi jergilikli avia tasıwshı qurallardı kórsetip, qural-jaraq rezervin burınǵıdan ádewir tez keńeytiw arqalı yadrolıq “úshlikti” kúsheytpekte.
Si Czinpin hám AQSh Prezidenti Donald Tramp arasındaǵı “diplomatiyalıq jıllı júzlilikler”ge qaramastan, keskinlik kúsheymekte. Vashington yadrolıq sınaqtı qayta baslaytuǵının járiyaladı, regiondaǵı AQSh awqamlasları Qıtaydıń qayta qurallanıwı kóleminen qáweterge túsken. Qánigeler Pekin Ukrainadaǵı urıs tájiriybesin jedel úyrenip atırǵanı, kúshli raketa hújimleri beriliwi, kelispewshilik júzege kelgen jaǵdayda Tayvan qamal etiliwi múmkin ekenliginen eskertpekte.
Sonıń menen birge Qıtay qońsılarına da basımdı kúsheytpekte. Qubla Qıtay teńizinde tartıs háwij almaqta, Yaponiya menen keskinlik artpaqta, Tayvan átirapındaǵı áskeriy shınıǵıw barǵan sayın keń kólemge iye bolmaqta.
Ekspertlerdiń atap ótiwinshe, Pekin Qurama Shtatlar menen texnologiyalıq hám áskeriy ayırmashılıqtı tez saplastıradı. Region aldınnan aytıp bolmaytuǵın jaǵdayǵa jaqınlaspaqta, suwıq qarama-qarsılıq ashıq túrge ótiw qáwpi artpaqta.

S.Rahimov, ÓzA