17-noyabr kúni Kóksaray rezidenciyasında Ózbekstan Respublikası Prezidenti Shavkat Mirziyoev hám Túrkmenstan Prezidenti Serdar Berdimuhamedovtıń tar sheńberdegi sóylesiwleri bolıp ótti.

Bul mámleketlik sapar Ózbekstan – Túrkmenstan doslıq, jaqsı qońsıshılıq hám strategiyalıq sheriklik qatnasıqların bunnan bılay da bekkemlew jolında áhmiyetli qádem bolatuǵını atap ótildi.
Barlıq tarawlarda erisilip atırǵan unamlı pát hám jedel baylanıslar qanaatlanıwshılıq penen atap ótildi. Húkimetleraralıq komissiya hám Isbilermenler keńesiniń májilisleri, sonday-aq, mádeniy ilajlar turaqlı túrde ótkerilip kelinbekte. Sapar aldınan Úrgensh hám Tashkentte ótkerilgen Túrkmenstan mádeniyatı kúnleri hám filmleriniń kórsetiliwi qatnasıwshılarda úlken tásir qaldırdı.
Ótken jılı tovar almasıw 1 milliard dollardan arttı. Júk tasıw kólemi artıp barmaqta, sonıń ishinde, Túrkmenbashı portınan paydalanıw jedellesken.
Sóylesiwlerde óz-ara sawdanı kóbeytiw hám sanaat, energetika, transport, mashina qurılısı, awıl hám suw xojalıǵı tarawlarında nátiyjeli kooperaciyanı rawajlandırıwǵa ayrıqsha itibar qaratıldı.
Aymaqlararalıq almasıwlardı jáne de keńeytiw áhmiyetli ekenligi atap ótildi. Xiywa qalasında úshinshi Aymaqlar forumın ótkeriwge kelisip alındı.
Regionallıq hám xalıqaralıq áhmiyetke iye máseleler boyınsha da pikir alısıldı.

ÓzA