Ózbekstan Respublikası Prezidenti Shavkat Mirziyoevtiń mirát etiwine bola Túrkmenstan Prezidenti Serdar Berdimuhamedov mámleketlik sapar menen elimizde bolıp tur.

Joqarı mártebeli miyman 17-noyabr kúni Ózbekstan Respublikası Bas ministri Abdulla Aripov penen birgelikte “Jańa Ózbekstan” parkine barıp, Ǵárezsizlik monumentine gúl qoydı.
Kompleks penen qısqasha tanısıw dawamında Túrkmenstan jetekshisine bul esteliktiń mazmunı hám arxitekturalıq sheshimleri haqqında maǵlıwmat berildi.
“Jańa Ózbekstan” baǵı hám Ǵárezsizlik monumentin mámleketimiz basshısınıń baslaması menen ǵárezsizligimizdiń otız jıllıǵına baǵıshlap qurılǵan. Úsh mıń jıldan aslam dáwir – ana Watanımız aymaǵındaǵı milliy mámleketshilik tariyxınıń tamırları sonshelli tereń. Monumentke itibar qaratqan adam mine usı awır ótmishtiń kórkem súwretleniwine gúwa boladı.
Joqarı mártebeli miymanlar, rásmiy sırt el delegaciyalarınıń elimizge saparı sheńberinde bul jerdegi monumentke gúl qoyıw dástúrge aylanǵan.
Komplekste sáwlelendirilgen ulamalar, ullı sárkarda hám jawıngerler, jadid babalarımızdıń tulǵalarına ayrıqsha itibar qaratıldı. Ana Watanımız, márt hám batır, tınıshlıqtı súyiwshi hám miynetkesh, qaharman xalqımız húrmetine qurılǵan Ǵárezsizlik monumenti Túrkmenstan Prezidenti hám delegaciya aǵzalarında úlken tásir qaldırdı.

Behruz XUDOYBERDIEV,
Nosirjon HAYDAROV (súwret), ÓzA