Ózbekstan Respublikası Prezidenti Shavkat Mirziyoev 15-noyabr kúni Oraylıq Aziya mámleketleri basshılarınıń jetinshi Másláhát ushırasıwında qatnasıw ushın elimizge kelgen Ázerbayjan Respublikası Prezidenti Ilham Aliev penen ushırasıw ótkerdi.

Sóylesiw aldınan Ilham Aliev Ózbekstan jetekshisine Másláhát ushırasıwında qatnasıwǵa mirát etkeni ushın minnetdarshılıq bildirdi.
Mámleketimiz basshısı, óz gezeginde, tuwısqan Ázerbayjan Prezidenti hám xalqın usı jıl 8-noyabr kúni belgilengen Jeńistiń bes jıllıǵı menen qızǵın qutlıqladı.
Ózbekstan Prezidentiniń usı jıl iyul ayında Ázerbayjanǵa mámleketlik saparı dawamında erisilgen kelisimlerdi ámelge asırıw sheńberinde Ózbekstan – Ázerbayjan strategiyalıq sheriklik hám awqamlaslıq qatnasıqların bunnan bılay da rawajlandırıw hám bekkemlewdiń áhmiyetli máseleleri dodalandı.
Barlıq dárejelerde nátiyjeli almasıwlar dawam etpekte. Usı jıldıń basınan tovar almasıwdıń kólemi 15 procentke arttı. Avtomobil qurılısı, energetika, turizm hám basqa da tarmaqlarda sanaat kooperaciyası boyınsha birgeliktegi joybarlar jedel basqıshqa kirgen.
Jetekshiler bolajaq joqarı dárejedegi ushırasıw hám ilajlardıń rejesin de kórip shıqtı.

ÓzA