Islam civilizaciyası orayında baslanǵan “Oraylıq Aziya: ulıwmalıq ruwxıy– aǵartıwshılıq miyras – ulıwmalıq keleshek” temasındaǵı xalıqaralıq kongress óz jumısın Oraylıq Aziya hám Ázerbayjan mádeniyat ministrleriniń birinshi ushırasıwı menen dawam ettirdi.

Bul sóylesiw 15-16-noyabr kúnleri Tashkent qalasında Ózbekstan Respublikası Prezidenti Shavkat Mirziyoevtiń basshılıǵında Oraylıq Aziya mámleketleri basshılarınıń jetinshi Másláhát ushırasıwı aldında ótkeriliwi onıń áhmiyetin jáne de kúsheytedi.
Oraylıq Aziya hám Ázerbayjan mádeniyat ministrleriniń birinshi ushırasıwı qızǵın, dóretiwshilik ideya hám baslamalarǵa bay túrde, doslıq ruwxında ótti.
Oǵan Ózbekstan Respublikası mádeniyat ministri Ozodbek Nazarbekov, Qazaqstan Respublikası mádeniyat hám málimleme ministri Aida Balaeva, Qırǵız Respublikası mádeniyat, málimleme hám jaslar siyasatı ministri Mirbek Mambetaliev, Tájikstan Respublikası mádeniyat ministri Matluba Sattoriyon, Túrkmenstan mádeniyat ministri Atageldi Shamiradov hám húrmetli miyman sıpatında Ázerbayjan Respublikası Mádeniyat ministri Adil Kerimli qatnastı.
Májilis kólemi hám dárejesi jaǵınan birinshi márte bunday ózine tán iri formatta ótkerildi.
Májiliste mádeniyat hám kórkem ónerdiń túrli baǵdarlarındaǵı birge islesiw máseleleri dodalandı.
– Búgingi globallasıw dáwiri jetiskenlikler menen birge mashqalalardı da júzege keltirip atırǵanı sır emes, – dedi Ózbekstan Respublikası mádeniyat ministri Ozodbek Nazarbekov. – Oraylıq Aziya hám Ázerbayjan Respublikası mádeniyat ministrleriniń bunday ushırasıwı jańasha formatta ótkerilip atırǵanı Prezidentimiz Shavkat Mirziyoevtiń baslaması bolıp esaplanadı. Biz tek birgelikte ǵana búgingi áhmiyetli mashqalalarǵa sheshim taba alamız. Oraylıq Aziya bir tamırdan ósip shıqqan tuwısqan xalıqlar sıpatında rawajlanıw hám tınıshlıqqa qaray umtılıp atırǵanına pútkil dúnya gúwa bolmaqta. Biz tuwısqan mámleketlerdiń maqset-umtılıslarınıń uqsaslıǵı, arzıw-niyetleriniń birligi aldımızǵa qoyılǵan maqsetlerge erisiwde úlken áhmiyetke iye. Usı mánide búgingi ilaj áhmiyetli ruwxıy platforma wazıypasın atqarmaqta.
– Bunday ushırasıwlar jaqsı unamlı nátiyjelerge alıp keledi, – dedi Qazaqstan Respublikası mádeniyat hám málimleme ministri Aida Balaeva. – Bul sóylesiwler bir márte emes, al dástúrge aylanıp, birge islesiwdiń jańa betlerin ashıw imkaniyatın bermekte. Birgelikte kóplegen mádeniy ilajlar, festivallar, dóretiwshilik baǵdarlamalar ótkerilmekte. Bul baǵdardaǵı jumıslardı bunnan bılay da kúsheytiw úlken áhmiyetke iye.
– Bul sóylesiw birge islesiwdiń jańa betin ashadı, – dedi Tájikstan Respublikası mádeniyat ministri Matlubaxon Sattoriyon. – Oraylıq Aziya xalıqları ázelden birge jasap kelgen. Bul diyar haqıyqattan da jetik danıshpanlar eli. Bul áyyemgi miyras mádeniy uqsaslıq, birge islesiwge, rawajlanıwǵa shaqıradı. Áyne mádeniyat tarawı mámleketlerimiz arasındaǵı isenim hám ózine tán bekkem ruwxıy kópir.
– Ázerbayjan Oraylıq Aziya mámleketleri menen YuNESKO, ICESCO, TÚRKSAY sıyaqlı jetekshi xalıqaralıq shólkemler sheńberinde birge islesip kelmekte, – dedi Ázerbayjan Respublikası Mádeniyat ministri Adil Kerimli. – Bul ilaj mádeniy-aǵartıwshılıq tarawlarında birgeliktegi kóplegen rejelerimizge túrtki bergeni menen áhmiyetli.
Ushırasıw dawamında regionallıq mádeniy birge islesiwdiń házirgi jaǵdayı hám perspektivaları, regiondaǵı mádeniyat ǵayratkerleri arasında mádeniy almasıwdı keńeytiw, Oraylıq Aziya ushın mádeniy brendti rawajlandırıw sıyaqlı máseleler haqqında hár tárepleme sóz etildi.

Nazokat Usmonova, ÓzAnıń xabarshısı