Islam civilizaciyası orayına sapar dawamında Oraylıq Aziya mámleketleri hám Ázerbayjan Prezidentleri “Keleshek miyrası” xalıqaralıq sıylıǵınıń laureatların sıylıqlaw máresiminde qatnastı.

Ózbekstan Respublikası Prezidentiniń qararı menen shólkemlestirilgen xalıqaralıq sıylıq ádebiyat, mádeniyat, kórkem óner, ilim, bilimlendiriw hám sanlı texnologiyalar tarawlarında úlken jetiskenliklerge erisken elimiz hám sırt el dóretiwshilerin xoshametlewge qaratılǵan.
Oraylıq Aziya mámleketleri hám Ázerbayjan wákilleri: Xalıqaralıq túrkiy mádeniyat shólkemi (TÚRKSAY) bas xatkeri, Qırǵızstan xalıq jazıwshısı Sultan Raev “Ádebiyat” nominaciyasında, Tájikstan xalıq shayırı Davlat Safarzoda “Mádeniyat” nominaciyasında, M.Avezov atındaǵı Qazaqstan Milliy drama teatrınıń aktyorı Erkebulan Dayirov “Teatr hám kino” baǵdarında, Ázerbayjan xalıq artisti Alim Gasimov “Muzıka hám ayaq oyın” nominaciyasında, Túrkmenstan xalıq artisti Babasari Annamiradov “Súwretlew hám ámeliy kórkem óner” baǵdarında, Ózbekstan Awıl xojalıǵı ministrligi janındaǵı xalıqaralıq oray direktorınıń orınbasarı, awıl xojalıǵı ilimleriniń doktorı Dilfuza Egamberdieva “Ilim, bilimlendiriw hám sanlı texnologiyalar” nominaciyasında tańlawdıń dáslepki jeńimpazları boldı.
Jetekshiler janında laureatlarǵa sıylıq statuetkası, diplom hám 10 mıń dollarlıq aqshalay sıylıq tapsırıldı.
Mámleket basshıları sıylı orın iyeleri menen súwretke tústi.

ÓzA