Ózbekstandaǵı Islam civilizaciyası orayında dawam etip atırǵan “Oraylıq Aziya: ulıwma ruwxıy-aǵartıwshılıq miyras – ulıwmalıq keleshek” temasındaǵı xalıqaralıq kongress baǵdarlamasınan tariyx, mádeniyat, ádebiyat, kino, sanlı texnologiya hám diniy-aǵartıwshılıq tarawların qamtıp alǵan bir qatar áhmiyetli ushırasıw hám forumlar orın alǵan.

Máselen, Oraylıq Aziya tariyxshıları II forumında regionnıń ulıwmalıq tariyxıy tamırları, derek tanıw hám arxeologiya tarawındaǵı birgeliktegi izertlewler, materiallıq hám ruwxıy miyrastı úyreniw máseleleri dodalandı.
“Ullı ótmish – ullı keleshek” súwretshiler ushırasıwında bolsa tuwısqan xalıqlardıń kórkem miyrasınıń uqsas tárepleri, zamanagóy kórkem óner tendenciyaları hám dóretiwshilik birge islesiwdi rawajlandırıw boyınsha áhmiyetli pikirler alısıldı.
“Ádebiy doslıq – máńgi doslıq” sóylesiwinde awdarma mektebin tiklew, ádebiy baylanıslardı kúsheytiw hám jas jazıwshılar ushın jańa imkaniyatlar jaratıw máselelerine itibar qaratıldı.
Kino forumda hújjetli hám tariyxıy filmlerde mádeniy qádiriyatlardı úgit-násiyatlaw, tarawda regionallıq birge islesiw kólemin keńeytiw boyınsha usınıslar ortaǵa taslandı.
“Islam qádiriyatların qásterlep saqlaw” forumında diniy-aǵartıwshılıq miyrastı saqlaw, zamanagóy diniy bilimlendiriwdi jetilistiriw hám jaslarda keńpeyillikti bekkemlew máseleleri kóterildi.
“Jaslar hám sanlı dáwir” sekciya májilisinde bolsa jasalma intellekt texnologiyasın mádeniy miyrastı sanlastırıwda qollanıw, jaslardıń innovaciyasın qollap-quwatlaw hám sanlı gumanitarlıq joybarlardı alǵa qoyıwǵa baylanıslı usınıslar bildirildi.
Xalıqaralıq kongress Oraylıq Aziya xalıqlarınıń ruwxıy birligi, awızbirshiligi hám ilimiy birge islesiwin joqarı basqıshqa alıp shıǵıw jolında áhmiyetli basqısh wazıypasın atqaratuǵını sózsiz.

ÓzA