Huqıqıy múnásibet

“Avtorlıq huqıqı hám túrles huqıqlar haqqında”ǵı nızamda avtorlıq huqıqqa tiyisli kóplegen maǵlıwmatlar berilgen. Onda avtor dúnyadan ótkennen keyin de onıń avtorlıq huqıqı kóp jıllar dawamında saqlanıp qalatuǵını kórsetilgen.
Bul boyınsha Yuridikalıq klinika xızmetkeri Aygerim Aripbaeva tómendegilerdi málim etti.

– “Avtorlıq huqıq hám túrles huqıqlar haqqında”ǵı nızamnıń 35-statyasına tiykarlanıp avtorlıq huqıq avtordıń pútkil ómiri dawamında hám onıń óliminen keyin jetpis jıl dawamında ámel etedi. Usı statyada hám basqa nızamlarda názerde tutılǵan jaǵdaylar buǵan kirmeydi.
Birgelikte dóretilgen shıǵarmaǵa bolǵan avtorlıq huqıq birgeliktegi avtorlardıń pútkil ómiri dawamında hám birgeliktegi avtorlar arasında eń uzaq jasaǵan aqırǵı shaxs qaytıs bolǵanınan keyin jetpis jıl dawamında ámel etedi.
Laqap astında yamasa imzasız nızamlı túrde járiyalanǵan shıǵarmaǵa bolǵan avtorlıq huqıq shıǵarma járiyalanǵannan keyin eliw jıl dawamında ámel etedi. Eger kórsetilgen múddet ishinde laqap astındaǵı yamasa imzasız shıǵarmanıń avtorı óz shaxsın málim etse yamasa bunnan bılay onıń shaxsı gúmanlı bolmasa, usı statyanıń birinshi bóliminde kórsetilgen múddetler qollanıladı.
Avtordıń óliminen keyin birinshi márte járiyalanǵan shıǵarmaǵa bolǵan avtorlıq huqıq shıǵarma járiyalanǵannan keyin jetpis jıl dawamında ámel etedi.
Avtorlıq huqıq, avtorlıq atına bolǵan huqıq hám avtordıń abırayın qorǵaw huqıqı múddetsiz qorǵaladı.
Shıǵarmaǵa Ózbekstan Respublikasınıń xalıqaralıq shártnamalarına muwapıq qorǵaw berilgen jaǵdayda, Ózbekstan Respublikası aymaǵında avtorlıq huqıqtıń ámel etiw múddeti usı statyaǵa muwapıq belgilenedi. Biraq bul múddet shıǵarma kelip shıqqan mámlekette belgilengen avtorlıq huqıqtıń ámel etiw múddetinen asıp ketpewi kerek.
Usı statyada názerde tutılǵan múddetlerdi esaplaw múddettiń óte baslawı ushın tiykar bolatuǵın yuridikalıq fakt júz bergen jıldan kelesi jıldıń birinshi yanvarınan baslanadı.

Gulnoza Boboeva, ÓzA