Prezident Shavkat Mirziyoevqa temir jol tarawında ámelge asırılıp atırǵan jumıslar hám kelesi jıllarǵa rejeler tanıstırıldı.

Temir jol tarmaǵında baslanǵan keń kólemli transformaciya processleri óziniń unamlı nátiyjelerin bere basladı. Ótken jıldı tarmaq birinshi márte sap payda menen juwmaqladı, usı jıldıń birinshi toǵız ayında sap payda 800 milliard sumnan arttı. Tranzit hám jolawshı tasıw, eksport hám investiciya kólemleri ósip barmaqta.
Prezentaciyada bul nátiyjeler menen sheklenip qalmastan, xalıqtıń sanı hám ekonomikanıń ósiwine sáykes túrde temir jol transportı xızmetleriniń sapasın hám qamtıp alıwın keńeytiw, tarmaqta qárejetlerdi qısqartıwdı dawam ettiriw zárúr ekenligi atap ótildi.
Atap aytqanda, transport esabınan baslap, háreket aǵımına shekemgi barlıq basqıshlarda jasalma intellekt tiykarında qadaǵalaw ornatıw arqalı qárejetlerdi tallaw, jol qoyılıp atırǵan joǵaltıwlardı anıqlaw hám sol tiykarda ózine túser bahanı 20 procentke azaytıw múmkin ekenligi atap ótildi.
2026-2030-jıllarda jolawshı hám júk tasıw kólemin keminde eki esege arttırıw zárúr ekenligi kórsetip ótildi.
Onı támiyinlew ushın 151 kilometr jańa temir jol qurıw, 182 kilometr aralıqtaǵı jollardı elektrlestiriw, sonday-aq, 27 stanciya hám 1 mıń kilometr joldı modernizaciyalaw rejeleri haqqında maǵlıwmat berildi.
Sonıń ishinde, “Nurafshan – Pskent – Bwka – Bekabad – Boyavut – Yangier” hám “Xavas – Dashtabad” jónelislerinde elektrlestirilgen jańa temir jollar qurıladı. “Qumqorǵan – Qudıqlı”, “Samarqand – Úrgit” hám “Baytqorǵan – Parkent” jolların elektrlestiriw, “Tashkent – Samarqand”, “Toqımashı – Angren” hám “Angren – Pop” jollarınıń ótkeriwsheńlik qábiletin arttırıw rejelestirilgen.
Respublika boylap qalalar átirapında qatnaytuǵın poezdlardıń háreketin jedellestiriw maqsetinde ámeldegi 40 jóneliske qosımsha jáne 15 jańa jónelis ashıw usınıs etildi.
Atap aytqanda, “Tashkent – Nurafshan – Ahangaran – Angren”, “Nawayı – Zarafshan – Úshqudıq”, “Qoqan – Namangan – Ándijan – Marǵilan”, “Termiz – Qumqorǵan – Baysın – Dárbent”, “Nókis – Shavat – Úrgenish – Xiywa”, “Jizzaq – Doslıq – Aydar-Arnasay kóli”, “Qarshı – Shahrisabz” sıyaqlı baǵdarlarda qala átirapı qatnawların jolǵa qoyıw arqalı xalıqtıń kúndelikli saparları ushın qolaylı sharayat jaratılıwı atap ótildi.
Májiliste joqarı tezlikte háreketlenetuǵın tarmaqtı keńeytiw máselesine de toqtap ótildi. Uzınlıǵı 102 kilometr bolǵan “Nawayı – Buxara” temir jol liniyasın paydalanıwǵa kirgiziwdi jedellestiriw tapsırıldı. Bul joldıń iske qosılıwı júk hám jolawshı tasıwda waqıt hám qárejetlerdi sezilerli qısqartıwǵa xızmet etetuǵını atap ótildi.
Kelesi jılları ashılatuǵın jańa jónelisler hám qurılıp atırǵan jollar ushın lokomotiv hám vagonlar parkin keńeytiw boyınsha da rejeler bildirildi.
Sonıń ishinde, Qıtaydan 38 magistral lokomotiv, 50 manyovrlı hám gibrid manyovrlı lokomotiv satıp alıw názerde tutılǵan. Koreyanıń “Hyundai Rotem” kompaniyası menen birgelikte 6 joqarı tezliktegi elektropoezd alıp kelip, olardan birinshisin kelesi jılı “Tashkent – Úrgenish – Xiywa” jónelisinde qatnawǵa qoyıw tapsırıldı. Bul arqalı jóneliste jol waqtı házirgi 14 saattan 7,5 saatqa shekem qısqarıwı kútilmekte.
Sonday-aq, mámleketimizde 250 zamanagóy jolawshı vagonların qurıw, qalalararalıq qatnaytuǵın 23 elektr poezdın satıp alıw arqalı jolawshılarǵa sharayatlar keńeytiledi. 10 mıń júk vagonların qurıw, 6 mıńnan aslamın tiklew hám 12 elektrovozdı kapital ońlaw wazıypaları belgilep alındı.
Temir jol tarawında jeke menshik sheriklik joybarların kóbeytiw zárúr ekenligi de kórsetip ótildi.
Májiliste “Qıtay – Qırǵızstan – Ózbekstan” temir jol qurılısı boyınsha ámeliy jumıslardıń barısı da kórip shıǵıldı.
Prezidentimiz bul joldıń Oraylıq Aziyada transport baylanıslılıǵın arttırıw hám mámleketimizdiń tranzit potencialın bunnan bılay da bekkemlewdegi strategiyalıq áhmiyetin ayrıqsha atap ótip, qurılıs jumıslarınıń sapasın támiyinlew boyınsha kórsetpeler berdi.
Májilis juwmaǵında temir jol tarmaǵın modernizaciyalaw hám keńeytiw boyınsha belgilengen joybarlardı óz waqtında hám sapalı ámelge asırıw, sanlı texnologiyalar hám jasalma intellektten keńnen paydalanıp, qárejetlerdi optimallastırıw, sonday-aq, tarawda jolawshılar hám biznes ushın jáne de qolaylı, qáwipsiz hám isenimli ortalıq jaratıw boyınsha juwapkerlerge anıq tapsırmalar berildi.

ÓzA