15-16-noyabr kúnleri Tashkent qalasında Ózbekstan Respublikası Prezidenti Shavkat Mirziyoevtiń basshılıǵında Oraylıq Aziya mámleketleri basshılarınıń jetinshi Másláhát ushırasıwı bolıp ótedi.

Sammitte Ázerbayjan Respublikası Prezidenti Ilham Aliev, Túrkmenstan Prezidenti Serdar Berdimuhamedov, Tájikstan Respublikası Prezidenti Emomali Rahmon, Qırǵız Respublikası Prezidenti Sadir Japarov, Qazaqstan Respublikası Prezidenti Qasım-Jomart Toqaev, sonday-aq, BMShtıń Oraylıq Aziya ushın preventiv diplomatiya boyınsha regionallıq orayınıń basshısı Kaxa Imnadze qatnasadı.
Ilaj kún tártibinen Oraylıq Aziyada regionallıq birge islesiwdi bunnan bılay da bekkemlew, sonday-aq, tiykarǵı tarawlarda birgeliktegi joybarlar menen baslamalardı ámelge asırıw máseleleri orın alǵan. Regionallıq hám xalıqaralıq siyasattıń áhmiyetli máseleleri boyınsha pikir alısıladı.
Másláhát ushırasıwınıń juwmaqları boyınsha kóp tárepleme hújjetlerdiń salmaqlı toplamınıń qabıl etiliwi kútilmekte.
Region mámleketleri basshılarınıń turaqlı másláhátlesiwlerin ótkeriw baslaması Ózbekstan jetekshisi tárepinen 2017-jıldıń sentyabr ayında BMSh Bas Assambleyasınıń 72-sessiyasında alǵa qoyılǵan edi.
Ózbekstannıń bul formattaǵı basshılıǵı dáwirinde birge islesiwdiń hár qıylı tarawların qamtıp alǵan 20 dan aslam iri ilajlar ótkerildi.

ÓzA