Salamat millet – hár qanday mámlekettiń tiykarǵı baylıǵı, onıń ekonomikalıq potencialı, ruwxıy qúdireti hám keleshektegi rawajlanıwınıń girewi.

Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komiteti baslıǵınıń orınbasarı Odiljon Mamatkarimov bul haqqındaǵı pikirleri menen ortaqlastı:
– Ótken segiz jıl dawamında mámleketimiz basshısınıń is-háreketleri nátiyjesinde “Insan salamatlıǵı – ullı qádiriyat” degen princip tiykarında densawlıqtı saqlaw sistemasında tariyxıy ózgerisler ámelge asırılǵanın atap ótiw kerek.
Jańa sistema, jańa qatnas hám jańa baǵdarlamalar ámeliyatqa engizildi. Bul taraw tek ǵana infrastruktura jaǵınan emes, al mazmun jaǵınan da jańa basqıshqa kóterildi. Toplanıp qalǵan kóplegen mashqalalardıń sheshimine qaratılǵan qatań ilajlar kórildi.
Pikirimizdi sanlar menen túsindiretuǵın bolsaq, sońǵı bes jıl ishinde qánigelestirilgen oraylar 7,5 trillion sumnan aslam qarjı esabınan zamanagóy jaǵdayǵa keltirilgen hám mıńlaǵan medicinalıq úskeneler menen támiyinlengen.
Tarawǵa engizilgen DMED birden-bir elektron platforması 36 million puqaranıń medicinalıq maǵlıwmatların birden-bir bazaǵa jıynaw, shıpakerlerge nawqas haqqındaǵı maǵlıwmattı tez alıw imkaniyatın jaratıp, emlew nátiyjeliligin arttırdı.
Mámleketimiz basshısınıń medicina hám farmacevtika tarawınıń wákilleri menen ushırasıwında mámleketimizde insan salamatlıǵın qorǵaw tarawında ámelge asırılıp atırǵan reformalar tallanıp, keleshektegi rejeler belgilendi. Kóplegen usınıs hám baslamalar alǵa qoyıldı.
Sonıń ishinde, kelesi oqıw jılınan baslap medicina joqarı oqıw orınlarında ulıwma medicina fakultetin ashıw hám bul fakultette pediatriya hám emlew baǵdarların qamtıp alıw, rezidentura hám magistratura sisteması arqalı shańaraqlıq shıpakerler tayarlap barıw usınıs etildi.
Eń áhmiyetlisi, rezidentura studentleri bir waqıttıń ózinde hám oqıp, hám islep miynet haqı alatuǵın sistema engiziletuǵını atap ótildi. Bul bolsa, jas shıpakerlerdiń mamanlıǵın arttırıw menen birge, olardıń tarawda jumısın dawam ettiriw ushın úlken xoshamet bolıp xızmet etedi. Sonday-aq, 2027-jılǵa shekem Joqarı miyirbiykelik jumısı baǵdarı boyınsha qabıllaw kvotaların eki esege arttırıw, joqarı maǵlıwmatlı miyirbiykelerdiń miynet haqısına 100 procent ústeme beriw wazıypası belgilendi.
Mámleketimiz basshısı jeke menshik sektorǵa keń imkaniyatlar jaratıw maqsetinde kelesi jıldan medicinalıq úskeneler hám tez járdem mashinaların alıp keliwdegi jeńilliklerdi úsh jılǵa sozıw, sonday-aq, 200 million dollarlıq jeńilletilgen resurs ajıratıp, zamanagóy klinikalar qurıw ushın isbilermenlerge járdem beriw baslamasın da alǵa qoydı.
Bildirilgen bul baslamalar, bárinen burın, xalqımız mápin támiyinlewge, insan ushın eń áhmiyetli baylıq bolǵan salamatlıqtı bekkemlewge qaratılǵan. Basqasha aytqanda, bul sistemanıń orayında insan qádiri, onıń ómiri hám salamatlıǵı turıptı.
Sol sebepli biz bunday iygilikli baslamalardı qollap-quwatlaymız. Olardı ámelde támiyinlew baǵdarında nızam hújjetlerin jetilistiriw, zárúr bolsa, jańa nızamlar qabıl etiw boyınsha jumıs alıp baramız.

ÓzA