Ózbekstan Sawda-sanaat palatası Qaraqalpaqstan Respublikası basqarmasında eksport jumısları menen shuǵıllanıwshı jergilikli kárxanalar ushın biznes forum shólkemlestirildi.

Onda Qaraqalpaqstan Respublikası Bajıxana basqarmasınıń juwaplı xızmetkerleri qatnasıp, bajıxana tarawındaǵı jańalıqlar hám eksport baǵdarındaǵı jeńillikler boyınsha úgit-násiyat jumısların alıp bardı.

Ilajdıń tiykarǵı maqseti – Qaraqalpaqstan isbilermenleri hám sırt elli sherikler arasındaǵı birge islesiwdi keńeytiw, sawda qatnasıqların bekkemlew hám aymaqtaǵı investiciyalıq ortalıqtı jetilistiriwden ibarat.

Ilaj dawamında “Sawdanı rawajlandırıw kompaniyası” AJ tárepinen eksportyorlar ushın kórsetilip atırǵan xızmet túrleri hám jańalıqlar, eksport-import jumısındaǵı jeńillikler hám qolaylı shártler, jańa tártip-qaǵıydalar haqqında túsinikler, “Bajıxana aymaǵında qayta islew” bajıxana rejimi abzallıqları, ónimlerdi qayta islep, tayar ónim sıpatında bazarǵa shıǵarılıwı, yamasa eksport kólemin arttırıwı múmkinligi haqqında maǵlıwmat hám usınıslar berildi. Qaraqalpaqstan isbilermenleri ushın investiciyalıq imkaniyatlar hám perspektivalı joybarlardı ámelge asırıw boyınsha usınıslar da berilip, eksportyorlar, isbilermenler hám túrli taraw wákilleri – qánigeler menen ashıqtan-ashıq sóylesiw tiykarında sóylesiwler alıp barılıp, ózlerin qızıqtırǵan sorawlarǵa juwap aldı.

Ilajda Qaraqalpaqstan isbilermenleri ushın jańa imkaniyatlar esigin ashıp, eksport potencialın arttırıw hám xalıqaralıq bazarlarda básekige shıdamlı ónimler jetkerip beriw boyınsha ámeliy qádemler belgilendi.

Qaraqalpaqstan xabar agentligi