Ózbekstan Respublikası Prezidenti Shavkat Mirziyoev Amerika Qurama Shtatları Yuta shtatınıń Isa Masih Sońǵı dáwir áwlieleri shirkewiniń aqsaqalı Devid Bednar hám “Stirling” xalıqaralıq qayırqomlıq fondınıń baslıǵı Mayls Xansennen ibarat biznes delegaciyasın qabılladı. Ushırasıwda AQShtıń Ózbekstandaǵı elshisi Jonatan Xenik te qatnastı.

Ózbekstan – AQSh strategiyalıq sheriklik qatnasıqlarınıń páti artıp atırǵan sharayatta Yuta shtatı menen sawda-ekonomikalıq hám investiciyalıq birge islesiwdi rawajlandırıw perspektivaları dodalandı.
Ózbekstan hám Yuta shtatı arasındaǵı jedel sóylesiw hám almasıwlar qanaatlanıwshılıq penen atap ótildi. Sanlastırıw, bilimlendiriw hám sociallıq qorǵaw tarawlarında birgeliktegi joybarlar baslanǵan.
Innovaciyalar, taw-kán sanaatı, hayal-qızlar isbilermenligi, inklyuziv bilimlendiriw, densawlıqtı saqlaw, suw támiynatı hám sanitariyalıq tarawlarda joybarlardı ámelge asırıw ushın úlken potencial bar ekenligi atap ótildi.
Juwmaǵında aymaqlararalıq baylanıslardı rawajlandırıw maqsetinde Yuta shtatı gubernatorı basshılıǵındaǵı delegaciyanıń Ózbekstanǵa saparın shólkemlestiriw boyınsha kelisimge erisildi.

ÓzA