Paytaxtımızdaǵı “Túrkstan” sarayında usı festival qatnasıwshıların sıylıqlaw máresimi jáne Ózbekstan milliy simfoniyalıq orkestri hám sırt elli kórkem óner ǵayratkerleriniń qatnasıwında úlken koncert baǵdarlaması bolıp ótti.

Máresim aldında Ózbekstan Respublikası mádeniyat ministriniń birinshi orınbasarı Bahodir Ahmedov shıǵıp sóylep, Batıs hám Shıǵıs mámleketleriniń klassikalıq muzıkasın kórsetiw, xalıqaralıq kategoriyadaǵı jetekshi orkestrler hám atqarıwshılar arasında doslıq qatnasıqlardı bunnan bılay da rawajlandırıw jáne olardıń óz-ara dóretiwshilik tájiriybe almasıwın támiyinlewde “Altın gúz” Xalıqaralıq kamer hám simfoniyalıq muzıka festivalınıń ornı sheksiz ekenin ayrıqsha atap ótti. Barlıq dóretiwshilik toparlarǵa tabıslı qatnasqanı ushın shın júrekten minnetdarshılıq bildirdi.
Ilaj dawamında festivalǵa belsene qatnasqanı ushın bir qatar miyman jámáátlerdiń wákilleri nhám Ózbekstan mámleketlik filarmoniyası dóretiwshilerin sıylıqlaw máresimi ótkerildi.
Bunnan soń saltanatlı jabılıw máresimine baǵıshlanǵan gala-koncert qoyıp berildi. Baǵdarlama dawamında xalıqaralıq tańlawlardıń jeńimpazları Ayana Bekenova, Elgiz Beyshenbaev (Qırǵızstan), Saltanat Orınbaeva (Qazaqstan), Shafoat Usmonzoda, Manuchehr Rahmonov (Tájikstan), Nikita Stacenko, Sarvinoz Wroqova (Ózbekstan), Fyodor Kabelskiy hám Rossiya Federaciyasında xızmet kórsetken artist Yuliya Rubina (Rossiya) tárepinen atqarılǵan dúnya klassikalıq muzıkasınıń belgili kompoziciyaları hám qosıqları tamashagóylerdiń joqarı alǵıslarına miyasar boldı.
Itibarlı tárepi, bul koncert baǵdarlamasında belgili kompozitor Oydin Abdullaevanıń “Jańa Ózbekstan” shıǵarması birinshi márte dúnyalıq premera sıpatında atqarıldı. Milliy saz ásbapları, sato, tanbur hám duwtar namalarınıń simfoniyalıq orkestr úylesiminde atqarılıwı usı muzıkalıq shıǵarmanıń tartımlılıǵın kórsetip, ıqlasbentlerge joqarı keypiyat baǵıshladı.
Bunnan tısqarı, koncertte V.A.Mocart, I.S.Bax, J.Bize, M.Glinka, S.Prokofev sıyaqlı belgili klassikalıq kompozitorlardıń shıǵarmaları sheberlik penen tamashagóylerge usınıldı.
Usınıń menen, “Altın gúz” ekinshi xalıqaralıq kamer hám simfoniyalıq muzıka festivalı óz juwmaǵına jetti. Onıń ullılıǵı hám tásirleri bolsa kóp waqıtqa shekem dóretiwshiler hám ıqlasbentlerdiń qálbinde saqlanıp qalıwı táájip emes.
Bul abıraylı festival mámleketler arasındaǵı mádeniy baylanıslardı jáne de bekkemlep, muzıka kórkem óneriniń tınıshlıq, doslıq hám awızbirshiliktegi kúshin jáne bir márte kórsetti.

N.Usmonova, ÓzA